Արցախ Կը Պատրաստուի Հիւրընկալելու Չճանչցուած Երկիրներու Ֆութպոլի Եւրոպայի Ախոյեանութիւնը

0
2252

ՍՏԵՓԱՆԱԿԵՐՏ, «Արցախփրէս».- Նախապէս հաղորդած էինք, թէ ՖԻՖԱի կողմէ չճանչցուած պետութիւնները համատեղելու նպատակով հաստատուած Ֆութպոլի անկախ միութիւններու համադաշնակցութիւնը՝ CONIFA-ն որոշած է 2019-ի Եւրոպայի ախոյեանութեան աւարտախաղերը կատարել Արցախի Հանրապետութեան մէջ:

Աւարտախաղերը տեղի պիտի ունենան  4-15 Յունիսին, իսկ անոնց պիտի մասնակցին 12 հաւաքականներ։

«Լեռնային Արցախ» ֆութպոլի ակումբի նախագահի տեղակալ Մհեր Աւանեսեան կը տեղեկացնէ, թէ արդէն սկսած են նախապատրաստական աշխատանքները եւ որդեգրուած է աւարտախաղերու խորհրդանշանը:

«Խաղերն անց են կացուելու Ստեփանակերտի, Մարտակերտի եւ Ասկերանի մարզադաշտերում: Որպէս պահեստային մարզադաշտ՝ ընտրուել է Ճարտար քաղաքինը: Յունիսի 4ին մեկնարկելիք մրցաշարին մասնակցող թիմերն (խումբերը) Արցախ են ժամանելու երեք օր շուտ՝ այդ առիթով Աարցխի Հանրապետութեան մշակոյթի, երիտասարդութեան հարցերի եւ զբօսաշրջութեան նախարարութեան կողմից նախատեսուող միջոցառումներին մասնակցելու նպատակով: Նախատեսւում է նաեւ մեծ թիւով լրագրողների այցն Արցախ», մանրամասնեց Աւանեսեան:

Արդէն ստեղծուած է յատուկ յանձնաժողով, որ կը զբաղի կազմակերպչական աշխատանքներով, ներառեալ՝ մարզադաշտերու բարեկարգում, ժամանող հիւրերու դիմաւորման եւ անոնց ապահովման, ինչպէս նաեւ բացման եւ փակման արարողութիւններուն վերաբերող հարցերով:

Անդրադառնալով մրցաշարքը Արցախի մէջ կատարելու որոշման՝ Աւանեսեան կը յայտնէ, որ 2013-էն ի վեր Արցախը CONIFA-ի անդամ է եւ 2014-ին անոր հաւաքականը մասնակցած է աշխարհի աւարտախաղերուն:

«Ընթացիկ տարուայ  25-29 Յուլիսին CONIFA-ի անդամներն այցելել են Արցախ՝ հանդիպել Հանրապետութեան նախագահ Բակօ Սահակեանի եւ Արցախի ֆուտբոլի ֆեդերացիայի (դաշնակցութեան) նախագահ Սամուէլ Կարապետեանի հետ: Արդէն Օգոստոսի կէսերին կար պաշտօնական յայտարարութիւն, որ առաջնութիւնն անց է կացուելու Արցախում», կը նշէ ան՝  աւելցնելով, որ Արցախի խումբին նախապատրաստման փուլը պիտի սկսի Նոյեմբերին:

Նշենք, որ անցեալ շաբաթ, աւարտախաղերու պատշաճ կազմակերպման համար, Արցախի Հանրապետութեան պետական նախարար Գրիգորի Մարտիրոսեանի գլխաւորութեամբ տեղի ունեցած էր առաջին աշխատանքային խորհրդակցութիւնը, որուն մասնակցած էին պետական տարբեր գերատեսչութիւններու եւ Արցախի ֆութպոլի դաշնակցութեան ղեկավարները:

Մարտիրոսեան ողջունեց CONIFA-ի որոշումը եւ նշեց, որ անհրաժեշտ է ներդրել բոլոր ջանքերը, որպէսզի մրցաշարքը իրականացուի բարձր մակարդակով:

Քննարկուած են անհրաժեշտ ենթակառուցուածքներու ստեղծման, մրցաշարքը լաւապէս ծանուցելու եւ այդ օրերուն մշակութային ծրագիրներ կազմակերպելու կարելիութիւնները:

«Անհրաժեշտ է յստակեցնել առաջնութեանը մասնակից բոլոր հաւաքականների ու երկրպագուների ընդունմանը, նրանց համար հաճելի միջավայրի ստեղծմանը վերաբերող բոլոր հարցերը: Այդ խոշոր միջոցառումը պէտք է վերածենք ֆուտբոլային իսկական տօնի, որպէսզի հայ հանդիսատեսն այն լիարժէք վայելի», ըսաւ Մարտիրոսեան:

LEAVE A REPLY

Please enter your comment!
Please enter your name here