ՀԲԸՄ-ՀԵԸ-Ը ՄԱՍՆԱԿՑԵՑԱՒ ՊԷՅՐՈՒԹԻ ՄԻՋԱԶԳԱՅԻՆ ՄԱՐԱԹՈՆԻՆ

0
2082

Յաջորդաբար   հինգերորդ   տարին ըլլալով, ՀԲԸՄ-ՀԵԸ –ը  իբրեւ կազմակերպիչ    գործընկեր   մաս կը  կազմէ  Պէյրութի  միջազգային Մարաթոնին:  ՀԲԸՄ-ՀԵԸ-ը կը  մնայ  Պէյրութի  Մարաթոնի նախապատրաստական  աշխատանքներուն կամաւորապէս մասնակցող  հայկական առաջին  կազմակերպութիւնը:

Նախորդ  տարիներուն  նման, ՀԲԸՄ- ՀԵԸ Անդրանիկ Անթիլիաս եւ Անդրանիկ Սեւան  սկաուտական զոյգ  շարժումներու  հարիւրէ աւելի    անդամ-անդամուհիներ (սկաուտ, արենուշ, քառավել, երէց  եւ խմբապետական կազմեր),  սատարեցին Մարաթոնի յաջողութեան: Կազմակերպիչները   գնահատեցին   ՀԲԸՄ-ՀԵԸ-ի  հետեւողական,  բծախնդիր եւ կամաւոր  մասնակցութիւնը:

ՀԵԸ-ի  սկաուտական  զոյգ շարժումները իրենց  խմբապետական կազմերով,  Շաբաթ   երեկոյեան համախմբուեցան  ՀԲԸՄ- ՀԵԸ-ի Զապէլ Մովսէսեան կեդրոնը: Անոնք  միասնաբար ընթրեցին,  կանուխ   քնացան, նկատի ունենալով  յաջորդ՝ Կիրակի օրուան  պարտականութիւնները: ՀԵԸ-ի Կեդրոնական Վարչութեան անդամներ Արթուր Գունտաքճեան եւ Շահան Սեմերճեան, ՀԲԸՄ-ի  Վարիչ տնօրէն Անիթա Լիպիար,  ՀԵԸ Անդրանիկ Անթիլիաս սկաուտական  շարժումի ընդհանուր խմբապետ  Եղիկ  Աւետիքեան,  ՀԵԸ Անդրանիկ Սեւան սկաուտական շարժումի ընդհանուր  խմբապետ  Կարեն Պասմաճեան, անոնց կողքին՝  Հասմիկ  Աւետիքեան, Թալին  Ճեպեճեսն – Ինքնատիոսեան,  Փերուզ  Թիւթիւնճեան,  Արին Ղազարեան, Նշան Ղորղորեան   մօտէն հետեւեցան աշխատանքներուն  յաջողութեան:

Առաւօտեան ժամը 4-ին, նախաճաշէն ետք, ՀԵԸ-ի սկաուտները երեք օթոպիւսներով  ուղղուեցան մայրաքաղաքի կեդրոնը: Օթոպիւսներուն վրայ կը  ծածանէին ՀԲԸՄ-ՀԵԸ-ի դրօշները:  Տղաքը   դիրք բռնեցին   մրցավազքի  «ֆինիշ լայն»ին երկու   կողմերը,  ուղեցոյց դառնալով վազորդներուն, իսկ աղջիկները  երկու խմբակներու բաժնուելով, ստանձնեցին տարբեր պարտականութիւններ, վազորդներուն  հայթայթելով  ջուր, սննդանիւթ, մետալներ  յանձնել շահողներուն:

Ուրախալի էր   տեսնել ՀԲԸՄ-  ՀԵԸ-ը ներկայացնող  մարզիկներու   մասնակցութիւնը  այս  տարուան Մարաթոնի երկու գլխաւոր  մրցումներուն: ՀԵԸ-ականներ՝ Արա  Խաչատուրեան եւ  տոքթ. Շահէ  Փարթամեան աւարտեցին 42  քլմ. մրցավազքը, մինչ՝  Անթիթա Լիպիար եւ Ժիւլ Շեհին՝ 21.5   քլմ.-ը:  Անոնք  Մարաթոնի աւարտին  ստացան  համապատասխան վկայական:

ՀԵԸ Անդրանիկ Անթիլիաս եւ  ՀԵԸ  Անդրանիկ  Սեւան  սկաուտական  շարժումները իրենց  օրինակելի ընթացքով,  ազգային  համերաշխութեան եւ  միասնականութեան   ոգի ներշնչեցին  Մարաթոնին  ողջ տեւողութեան:

ՀԵԸ-Ի ՄԱՄԼՈՅ  ԵՒ ՏԵՂԵԿԱՏՈՒԱԿԱՆ ԳՐԱՍԵՆԵԱԿ

 

 

 

LEAVE A REPLY

Please enter your comment!
Please enter your name here