ՆՈՐ ՏԱՐՈՒԱՆ ՄԱՂԹԱՆՔՆԵՐ

0
403

 

Թանկագին հարազատներ,

 

         Բախտաւոր ենք՝ որ Աստուծոյ կամքով, տարի մը եւս բարդուեցաւ մեր կեանքի լոյսին:

         Մայր բնութիւնը զայրացած է մեզմէ եւ անէծք կը թափէ մարդկութեան վրայ, մասնաւորապէս անխիղճ եւ անգութ հզօր պետութեանց գլխուն, որովհետեւ անոնք արուեստական պատուհասներ ստեղծելով, պատերազմներ հրահրելով եւ թունաւոր ռումբեր պայթեցնելով, կը հրթեհեն բնութեան կանաչապատ պարտէզները՝ անտառները, մարդկային արեամբ կը որոգեն մարգագետինները՝ դաշտերը՝ նոյնիսկ  խոպան անբարեբեր հողերը եւ կը քանդեն գիւղերը՝ քաղաքները եւ խրճիթները:

        Այդ պատճառներով՝ համայն մարդկութիւնը կ՛ապրի դժուարին օրեր եւ ողբերգութիւններ, եւ բոլորին կարգին նաեւ՝ հայ ժողովուրդը ամէնուրեք եւ մանաւանդ հայրենի ժողովուրդը:

         Այս տարի՝ 2019ի Ամանորը եւ Սուրբ Ծննդեան տօները, հայ ժողովուրդը կը դիմաւորէ նոր յոյսերով՝ նոր հաւատքով՝ նոր ոգիով, որովհետեւ միահեծան՝ տիրապետական իշխանութեան շղթաները, խաղաղօրէն փշրուեցան՝ հայրենի ժողովուրդին, ազատական եւ ժողովրդավարական կամքին շնորհիւ:

        Նոր հորիզոններ բացուեցան հայ ժողովուրդին առջեւ, աշխատանքով, ստեղծագործութիւններով, ինքնակերտումով, հաւատարմութեամբ, պարկեշտութեամբ, պարտաճանաչութեամբ, կարգապահութեամբ, ինքնաճանաչութեամբ՝ պէտք է արժեւորել՝ անկախութեան ճշմարիտ իմաստը, եւ ստեղծել արդար՝ ապահով եւ բարոյական արժէքներով զրահուած ընկերութիւն մը եւ պետական կառոյցներ՝ որոնք կը գործեն օրինապահութեամբ եւ կարգապահութեամբ:

        Ամանորի եւ Ս. Ծննդեան հոգիէն, յաւերժ սրբութիւն եւ բարութիւն տեղացող լոյսերը, թող Աստուծոյ երկիւղը բնակեցնեն եւ խաղաղութեան սիրով լուսաւորեն, այդ հզօր կառավարիչներուն միտքերը եւ սրտերը:

        Եկէք այս օրհնեալ սրբացած օրերուն, բոլորս միասնաբար երգենք եւ աղօթենք:

 

Քրիստոս Ծնաւ եւ Յայտնեցաւ,

Ձեզի մեզի մեծ Աւետիս:

 

                            Զաւէն և Ալիս Գրիգորեան

 

 

LEAVE A REPLY

Please enter your comment!
Please enter your name here