ՀՀ Սփիւռքի Նախարար Հրանոյշ Յակոբեան Ընդունեց «Իմ Հայաստան» Փառատօնի Պարախումբերու Ղեկավարները

0
100

Յուլիս 2-ին ՀՀ սփիւռքի նախարար Հրանոյշ Յակոբեան ընդունեց «Իմ Հայաստան» համահայկական փառատօնի մասնակից 36 պարախումբերու եւ պատուիրակութիւններու ղեկավարերը:

Ողջունելով հիւրերը` նախարար Հրանոյշ Յակոբեան նշեց. «Կարծում եմ` երէկ միասին յաղթանակ տարանք, քանի որ մեզ յաջողուեց մէկտեղել մեր ազգի շատ բեկորներ, մէկտեղել մեր ուժը, համախմբուել հայկականութեան գաղափարի շուրջ:

Իմ շնորհակալութիւնն ու խոնարհումը ձեզ, որ կարողացել էք օտար ափերում հայապահպանութեանն ուղղուած այսպիսի վեհ գործ անել, քանի որ պարապմունքի այդ մի քանի ժամուայ ընթացքում միայն ազգային պարը չէ, որ սովորեցնում էք աշխարհասփիւռ մեր զաւակներին, այլ առաջին հերթին փոխանցում էք հայոց լեզուն, հայերէն խօսքը եւ ազգային ոգին: Ուզում եմ շնորհակալութիւն յայտնել նաեւ ծնողներին, որովհետեւ միայն ընտանիքում հայկականութեան, ազգային արժէքների նկատմամբ ջերմութեան ու նուիրուածութեան շնորհիւ է հնարաւոր զաւակների մօտ սէր առաջացնել դէպի ազգային արժէքները»:

Հանդիպման ընթացքին, մէկը-միւսին յաջորդելով, երախտագիտութեան ու նուիրումի խօսքեր հնչեցուցին գրեթէ բոլոր պատուիրակութիւններու ներկայացուցիչները, անոնք միաբերան ընդգծեցին, որ առաջին փառատօնին համեմատ այս տարի արդէն յառաջընթաց գրանցուած է: Ներկաներու խօսքերով` ազգային համախմբուածութեան այս իւրօրինակ փառատօնը աշխարհի տարբեր ծայրերու հայկական համայնքներու ու Հայրենիքի միջեւ կը վերացնէ տարածական հեռաւորութիւնը. փառատօնէ-փառատօն պարային խումբերը կ’ապրին մէկ մտքով` լաւագոյնս պատրաստուիլ «Իմ Հայաստան» փառատօնին: Պարախումբերու պատուիրակութիւններու ներկայացուցիչները բարձր գնահատելով նախարար Հրանոյշ Յակոբեանի գործունէութիւնը` ՀՀ սփիւռքի նախարարին պարգեւատրեցին իրենց համայնքներու եւ պատուոյ հիւպատոսներու պատուոգիրներով եւ շնորհակալագիրներով:

Փառատօնի «Պարարուեստի օրեր» ծրագիրին մասնակցելու համար աշխարհի 12 երկիրներէ հայրենիք ժամանած են 36 պարախումբեր` ՌԴ-էն, Վրաստանէն Ուքրանիայէն, Լիբանանէն, Քոււէյթէն, Աւստրալիայէն, Քանատայէն, Ֆրանսայէն, ԱՄՆ-էն, ինչպէս նաեւ Հայաստանի եւ Արցախի պարախումբեր:

Յիշեցնենք, որ ՀՀ սփիւռքի նախարարութիւնը, ՀՀ Նախագահ Սերժ Սարգսեանի բարձր հովանիի ներքոյ, 2012 թուականէն` երկու տարին անգամ մը, կ’իրականացնէ «Իմ Հայաստան» համահայկական փառատօնը: Այս տարի փառատօնի հանդիսաւոր բացումը կայացաւ նախորդ օրը` յուլիս 1-ին Ալ.Սպենդիարեանի անուան օփերայի եւ պալէի ազգային ակադեմական թատրոնին մէջ: Իրենց ներկայութեամբ հանդիսութիւնը պատուած էին ՀՀ առաջին տիկին Ռիտա Սարգսեան, Հայաստանի Ազգային Ժողովի նախագահ Գալուստ Սահակեան, ՀՀ վարչապետ Յովիկ Աբրահամեան, ՀՀ սփիւռքի նախարար Հրանոյշ Յակոբեան եւ այլ պաշտօնատար անձիք, հասարակական գործիչներ, արուեստագէտներ, մտաւորականներ:

«Իմ Հայաստան» համահայկական փառատօնի գլխաւոր հովանաւորն է «Օրանժ Արմէնիա» ընկերութիւնը, փառատօնի հովանաւորն է «Տաշիր գրուպ» ընկերութիւնը, փառատօնին տեղեկատուական աջակցութիւն կը ցուցաբերեն «Հայաստանի հանրային», «Շանթ», «Երկիր Մեդիա» հեռուստաընկերութիւնները եւ Հայաստանի հանրային ռատիօն:

LEAVE A REPLY

Please enter your comment!
Please enter your name here