Թուրքիա Պէտք Է Ճանչնայ Հայոց Ցեղասպանութիւնը

 Հայաստան այցելող Գերմանիոյ դաշնակցային հանրապետութեան խորհրդարանի փոխնախագահ Ուոլֆկակն Թիրզէ Չորեքշաբթի, Հոկտեմբեր 3-ին յայտարարեց, թէ Հայաստանի հետ Գերմանիոյ յարաբերութիւնները արդէն իսկ 20 տարուան կեանք ունին եւ անոնք միշտ բնականոն եւ ոչ խնդրայարոյց եղած են:
«Մենք բազմապիսի հանդիպումներ ունեցանք երկիրի նախագահին, խորհրդարանի եւ կառավարութեան ղեկավարներու, նաեւ տարբեր կուսակցութիւններու պատգամաւորներու հետ: Շատ խիտ եւ տեղեկութիւններով յագեցած այց էր», յայտնեց ան:
   Անդրադառնալով Ցեղասպանութեան ուրացումը քրէականացնելու հարցին՝ ան ըսաւ. «Գերմանիա կը դատապարտէ բոլոր նման յանցագործութիւնները: Հայաստանի պարագային՝ մենք դատապարտումը արտայայտելու յատուկ բանաձեւ վաւերացուցած ենք: Թուրքիա պէ՛տք է ճանչնայ Ցեղասպանութիւնը, սակայն մենք չենք կրնար արտասահմանէն այդ մէկը պարտադրել: Այդ մէկը լուրջ ջանքեր պահանջող գործընթաց է: Ինքնաքննադատական գիտելիքները տակաւին պէտք է հասնին թուրք հասարակութեան»:
    Լեռնային Ղարաբաղի անկախութիւնը ճանչնալու մասին հարցումի մը պատասխանելով՝ ան ըսաւ, թէ տակաւին նման մտադրութիւն չկայ, քանի որ «Հայաստանի եւ Ատրպէյճանի միջեւ առկայ Լեռնային Ղարաբաղի հակամարտութեան լուծումը կարելի է հեռաւոր Պերլինէն բերել», աւելցնելով, թէ Գերմանիա պարզապէս կ՛աջակցի Մինսկի խմբակին:
Թիրզէ մարդասպան Սաֆարովի հերոսացումը նկատեց «Ատրպէյճանի տկարութեան արտայայտութիւն»:
Փոխնախագահը այցելեց նաեւ Ցեղասպանութեան թանգարան-հիմնարկը, ծանօթացած է Մեծ Եղեռնը հաստատող փաստաթուղթերուն ու վաւերագիրներուն, ապա «Պատուոյ հիւրեր»ու յուշամատեանին մէջ գրեց. «Կը դատապարտենք Ցեղասպանութիւնը ու պարտաւոր ենք խաղաղութիւն հաստատել եւ պաշտպանել մարդկային իրաւունքները»:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button