ԹՈՒՐՔԻՈՅ ԸՆԴԴԻՄՈՒԹԻՒՆԸ ԿԸ ՄԵՐԺԷ ՍՈՒՐԻՈՅ ԴԷՄ ՌԱԶՄԱԿԱՆ ԳՈՐԾՈՂՈՒԹԻՒՆՆԵՐԸ

Թուրքիոյ  ընդդիմադիր ժողովրդահանրապետական Կուսակցութիւնը իր ընդդիմութիւնը յայտնեց թրքական բանակին կողմէ  Սուրիոյ  տարածքին մէջ ռազմական որեւէ գործողութեան: Կուսակցութեան  ղեկավար Քեմալ  Քիլըճտարօղլու, Թուրքիոյ խորհրդարանին մէջ խօսք առնելով զգուշացուց, թէ Սուրիոյ  հարցով անհրաժեշտ է վարել «խելամիտ»  քաղաքականութիւն:

  Սուրիոյ տարածքին անդրսահմանային  ռազմական գործողութիւններ  իրագործելու  հարցը  յառաջացաւ այն  բանէն ետք, երբ Թուրքիոյ սահմանակից Ռաքքա  քաղաքին կից  Թէլ Ապիատի շրջանը ահաբեկիչներէն  ազատագրելու նպատակով  արձակուած ռումբ մը թիւրիմացաբար ինկաւ Ուրֆա նահանգի Աքչալա գիւղի բնակարաններէն մէկուն վրայ, սպաննելով տանտիրուհին եւ անոր չորս  զաւակները:

  Սուրիոյ  տեղեկատուութեան նախարարութիւնը պաշտօնապէս ցաւակցութիւն յայտնեց  զոհերու  հարազատներուն, յայտարարելով, թէ հետաքննութիւն մը բացած է այդ ցաւալի միջադէպին շուրջ:

  Ռուսիոյ արտաքին գործոց նախարար Սերկէյ Լավրով պահանջեց, որ Սուրիոյ եւ Թուրքիոյ  իշխանութիւնները ուղիղ կապ հաստատեն իրարու հետ եւ անմիջապէս մեղմացնեն սահմանային միջադէպերուն հետեւանքով  ծայր առած  լարուածութիւնը: Լավրով   միաժամանակ ցաւ յայտնեց, որ ՄԱԿ-ի Ապահովութեան Խորհուրդը  չի դատապարտեր Սուրիոյ մէջ ահաբեկչական նոր գործողութիւններու վերսկսումը:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button