ՆԱԽԱԳԱՀ ՍԱՐԳՍԵԱՆ ԸՆԴՈՒՆԱԾ Է ՆԱԽԱԳԱՀԻ ԿՐԹԱԿԱՆ ՊԱՐԳԵՒՆԵՐՈՒՆ ԱՐԺԱՆԱՑԱԾ ՈՒՍԱՆՈՂՆԵՐԸ

ՀՀ նախագահ Սերժ Սարգսեան Հոկտեմբեր 4-ին ընդունած է տեղեկատուական ճարտարագիտութիւններու (ՏՃ) բնագաւառին մէջ ՀՀ նախագահի 2012-ի կրթական պարգեւներուն արժանացած ուսանողներն ու աշակերտները: Այս մասին կը հաղորդեն ՀՀ նախագահի մամլոյ գրասենեակէն։

Հանրապետութեան ղեկավարը` նախագահի նստավայրին մէջ տեղի ունեցած պարգեւատրման հանդիսաւոր արարողութեան ժամանակ` մրցանակակիրներուն յանձնած է տարբեր անուանակարգերու մէջ անոնց շնորհուած պարգեւները. իւրաքանչիւր անուանակարգի համար վկայագիրի հետ միասին երիտասարդները ստացած են յուշախորհրդանիշ եւ դրամական պարգեւ:

ՏՃ բնագաւառին մէջ նախագահի կրթական պարգեւը կը շնորհուի ամէն տարի` բարձր յառաջդիմութիւն ունեցող այն ուսանողներուն եւ աշակերտներուն, որոնք աշխոյժօրէն կը մասնակցին ՏՃ բնագաւառի եւ բնական գիտութիւններու տարբեր ողիմպիականներու եւ մրցոյթներու, գիտական յօդուածներու հեղինակներ են, ունին բազմակողմանի գիտելիքներ եւ տաղանդ, ինչպէս նաեւ ներգրաւուած են հասարակական ծրագրերու մէջ:

Յաղթողներուն համար սահմանուած են` “Գլխաւոր մրցանակ”, “Լաւագոյն ասպիրանտ”, “Լաւագոյն մագիստրանտ”, “Լաւագոյն պագալաւր”, “Լաւագոյն սփիւռքահայ մասնակից”, “Լաւագոյն ուսանողուհի”, “Լաւագոյն աշակերտ” անուանակարգերն ու մրցանակները: Մրցանակաբաշխութեան գործընթացը կ’իրականացուի ՀՀ նախագահի կարգադրութեամբ հաստատուած կրթական պարգեւներու շնորհման յանձնաժողովին կողմէ: Թեկնածուներուն ներկայացուող պահանջները, անոնց ընտրութիւնը եւ առաջադրումը կը կատարուի “Սինոփսիս Արմէնիա” ընկերութեան եւ “Հայաստան” համահայկական հիմնադրամին միջեւ կնքուած համաձայնագիրին համաձայն: Իւրաքանչիւր անուանակարգի համար շնորհուող դրամական պարգեւները կը յատկացուին “Սինոփսիս Արմէնիա” ընկերութեան կողմէ:

Նախագահ Սերժ Սարգսեան շնորհաւորած է բարձր յառաջդիմութիւն ցուցաբերած եւ Նախագահի 2012-ի կրթական պարգեւներուն արժանացած ուսանողներն ու աշակերտները, մաղթած նոր յաջողութիւններ:

“Յարգելի՛ երիտասարդներ,

Այսօր դուք այստեղ էք, եւ մենք ձեզ կը գովաբանենք ձեր գիտելիքներուն, ձեր կրթութեան շնորհիւ: Շատ լաւ կը հասկնաք կրթութեան դերը ներկայ աշխարհին մէջ: Այսօր ատիկա բոլորը կը հասկնան: Պատահական չէ, որ այս ոլորտի զարգացման մենք առաջնային նշանակութիւն կու տանք: Մենք պէտք է կրնանք հասնիլ ոչ միայն ժամանակակից չափանիշներուն համապատասխանող կրթութեան, այլեւ զայն հասանելի դարձնենք բոլորին: Մենք մեզ երբեք չենք կրնար ներել, եթէ պարզուի, որ ապագայ հանճարը այդպիսին չէ դարձած սոսկ այն պատճառով, որ հնարաւորութիւն չէ ունեցած կրթութիւն ստանալու:

Մենք դեռ խորհրդարանական ընտրութիւններուն ժամանակ խոստացած էինք կրթութիւնը դարձնել հնարաւորինս մատչելի: Այստեղ է նաեւ կրթութեան նախարարը: Մենք արդէն համաձայնած ենք արագ մշակել եղանակներ, որոնք թոյլ պիտի տան բոլոր այն ուսանողներուն, որոնք կը փափաքին ուսումը շարունակել համալսարաններու մէջ, բայց բաւականաչափ վճարունակ չեն, խնդիրներ չունենալու: Մեր համոզմունքն է` Հայաստանի մէջ չի կրնար ըլլալ գէթ մէկ լաւ սորվող երիտասարդ, որ ուսման վարձքին պատճառով չկրնայ շարունակել ուսումը: Ասիկա ես կը համարեմ սկզբունքային հարց, եւ այդ հարցը մենք հիմա կը լուծենք արմատապէս: Կը շեշտեմ. ոչ մէկ լաւ սորվող երեխայ դուրս պիտի չմնայ ուսման գործընթացէն իր նիւթական վիճակին պատճառով: Նիւթապէս անապահով ընտանիքներու երեխաներն ալ մե՛ր երեխաներն են, եւ ուսման իրաւունքի իրականացման հարցերուն մէջ պիտի ունենան հաւասար հնարաւորութիւններ: Աւելին` մենք ասով (եւ ոչ միայն ասով) պիտի ապահովենք կրթական գործընթացի շարունակականութիւն: Ե՛ւ միջին մասնագիտական, ե՛ւ բարձրագոյն որակեալ կրթութիւնը հասու պիտի ըլլայ բոլորին` առանց բացառութեան:

Մենք կրթութեան նախարարի հետ համաձայնած ենք նաեւ աշխատելու 12-ամեայ կրթութիւնը պարտադիր դարձնելու ուղղութեամբ: 12-ամեայ պարտադիր եւ անվճար հանրակրթութիւնը եւ մասնագիտական կրթութիւնը պիտի դառնան մեր կեանքին ցուցանիշը:
Ասիկա կը համարեմ մեր ժամանակի հրամայականը եւ մեր կրթական ոլորտի բարեփոխումներու կարեւոր բաղադրիչը: Ըսուածը լոկ ցանկութիւն չէ, այլ արդէն կառավարութեան գործունէութեան ծրագիրի մաս, որ պիտի իրականացուի հետեւողականօրէն:

Սիրելի՛ պարգեւատրուածներ,

Կրկին կը շնորհաւորեմ ձեզ այս պարգեւներուն առիթով, որոնք հաւանաբար ձեր կեանքին մէջ առաջինն են: Ամենամեծ յաջողութիւններն ալ կը սկսին առաջին քայլով, եւ ես կը մաղթեմ, որ ասով ձեր առջեւ նոր` աւելի լայն դռներ բացուին: Կը շնորհաւորեմ եւ շնորհակալ եմ ձեզ ձեր աշխատանքին, ձեր ջանքերուն, ձեր եռանդին համար”,- ըսած է նախագահ Սերժ Սարգսեան:

Հանրապետութեան ղեկավարը նաեւ խօսած է ժամանակակից միջոցներով եւ հմտութիւններով զինուած տեղեկատուական հասարակութիւն ձեւաւորելու ճանապարհին բոլոր ժողովուրդներուն եւ ազգերուն նետուած մեր դարաշրջանի մարտահրաւէրներուն մասին: Սերժ Սարգսեան ընդգծած է, որ այստեղ մեր յաւակնութիւնները պէտք է ըլլան աւելի մեծ եւ ընդգրկուն:

Նախագահի համոզմամբ, այս ոլորտին մէջ կան Հայաստանի ժողովուրդի եւ ողջ հայութեան մրցունակութեան բարձրացման լուրջ ներուժ եւ լայն հնարաւորութիւններ, որոնք դեռ պէտք է բացայայտուին եւ իրագործուին: Այս տեսանկիւնէն Սերժ Սարգսեան կարեւոր համարած է այն աշխատանքը, որ կը կատարուի յատկապէս պատանիներու եւ երիտասարդներու համար:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button
 

STAINLESS STEEL

 

–>