ՆԱԽԱԳԱՀ ՍԸԼԷՅՄԱՆ ԵՐԿԽՕՍՈՒԹԵԱՆ ԿՈՉ Կ’ՈՒՂՂԷ ՍՈՒՐԻՈՅ ՏԱԳՆԱՊԻՆ ԼՈՒԾՄԱՆ ՀԱՄԱՐ

Լիբանանի Հանրապետութեան նախագահ զօր. Միշել Սըլէյման Արժանթինի մէջ հանդիպում մը ունեցաւ Արժանթինի նախագահ Քրիսթինա Ֆերնանտեզ տը Քիրչնըրի հետ, որուն հետ քննարկեց լիբանանեան եւ շրջանային իրադարձութիւնները, ինչպէս նաեւ երկկողմանի յարաբերութիւններն ու զանոնք ամրապնդելու անհրաժեշտութիւնը:

Հանդիպումէն ետք տրուած միացեալ մամլոյ ասուլիսի մը ընթացքին նախագահ Սըլէյման կոչ ուղղեց Սուրիոյ տագնապին անմիջական լուծում մը գտնելու, պայմանաւ որ անիկա հիմնուած ըլլայ երկխօսութեան եւ համախոհութեան վրայ:

Նախագահ Սըլէյման հաստատեց, որ Արժանթինի հետ համաձայնութիւն գոյացած է երկկողմանի գործակցութիւնը բարելաւելու ահաբեկչութեան դէմ պայքարի մարզին մէջ:

Լիբանանի եւ Արժանթինի միջեւ համաձայնութիւններ ստորագրուեցան նաեւ կրթութեան եւ զբօսաշրջութեան մարզերուն մէջ:

Նախագահ Սըլէյման ընդունեց նաեւ լիբանանեան գաղութի հոգեւոր պետերը, որոնց հետ քննարկեց Լիբանանին կառչած մնալու կարեւորութիւնը: Քննարկուեցաւ նաեւ լիբանանեան քաղաքացիութիւնը ձեռք ձգելու անհրաժեշտութիւնը:

Նշենք, որ արժանթինեան մամուլին հետ իր հանդիպումին ընթացքին նախագահ Սըլէյման շեշտեց, որ Լիբանան կառչած կը մնայ Սուրիոյ տագնապին նկատմամբ իր որդեգրած չէզոք կեցուածքին` աւելցնելով, որ Լիբանան դէպի Սուրիա զէնքերու ու հրթիռներու իբրեւ մուտք պիտի չծառայէ, իսկ Սուրիա Լիբանանի դէմ հրթիռներ պէտք չէ արձակէ եւ պէտք չէ լիբանանեան հողեր ներխուժէ:

Նախագահ Սըլէյման հաստատեց, որ Լիբանանի մէջ Սուրիական ազատ բանակի խարիսխներ գոյութիւն չունին:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button
 

STAINLESS STEEL

 

–>