ԵԽԽՎ ՊԱՏԳԱՄԱՒՈՐՆԵՐԸ «ԽԱՅՏԱՌԱԿՈՒԹՒԻՆ» Կ’ՈՐԱԿԵՆ ՍԱՖԱՐՈՎԻՆ ՆԵՐՈՒՄ ՇՆՈՐՀԵԼԸ

Եւրոխորհուրդի խորհրդարանական վեհաժողովին մէջ հայաստանեան պատուիրակութեան ղեկավար Դաւիթ Յարութիւնեան խստօրէն արձագանգած է Ռամիլ Սաֆարովի արտայանձնման վերաբերեալ հունգար խորհրդարանական Իմրէ Վէյգի յայտարարութեան, ըստ որուն` անիկա համապատասխանած է Սթրազպուրկեան համաձայնագիրին, եղած է օրինական գործընթաց եւ ուղղուած չէ Հայաստանի կամ հայ ժողովուրդին դէմ: Այս մասին կը հաղորդէ Armenpress.am-ը: Դաւիթ Յարութիւնեան նշած է, որ Սաֆարովի նկատմամբ դատավճիռին հունգար դատաւորը յստակ յայտարարած է յանցագործութեան մասին, իսկ մեղադրեալը չէ զղջացած արարքին համար: “Չնայած շատ կազմակերպութիւններու կողմէ դատապարտման դէպքերուն` ատրպէյճանցի ոչ մէկ պաշտօնեայ դատապարտեց ներում շնորհելու որոշումը: Հակառակը, անոնք դիմեցին ռասիստական եւ ազգային ատելութիւն սերմանող յայտարարութիւններու: Փորձելով արդարանալ իրենց հասարակութեան առջեւ` անոնք ԶԼՄ-ներու միջոցով կեղծ փաստեր տարածեցին, որ Սաֆարովը “պաշտպանած է իր դրօշը”, սակայն վկաները կը նշեն, որ ատիկա չի համապատասխաներ իրականութեան”,- ընդգծած է Յարութիւնեան:

 Ան նշած է, որ ԵԽԽՎ-ի մէջ չի բարձրացուիր Հայաստանի եւ Ատրպէյանի միջեւ առկայ խնդիրը, այլ խօսքը մարդու հիմնարար իրաւունքներու խախտման եւ Ատրպէյճանի կողմէ այլ ազգի մը նկատմամբ ատելութիւն ու թշնամանք սերմանող քարոզչութեան մասին է: ԵԽԽՎ իրաւաբանական յանձնաժողովի նախագահ Քրիսթոֆըր Չոբ իր հերթին ըսած է, որ ատրպէյճանցի մարդասպան Ռամիլ Սաֆարովի գործին քննարկման ծիրէն ներս անհրաժեշտ է հասկնալ, թէ ինչ կը նշանակէ ներում շնորհելը: “Չի կրնար այլ կարծիք ըլլալ, քանի որ Սաֆարովը յանցագործ է: Անհրաժեշտ է ոչ թէ խօսիլ օրէնքներու մասին, այլ օրէնքի գերակայութեան մասին, երբ մարդիկ վերադառնալով իրենց հայրենիք կը գովաբանուին եւ ոչ թէ կը դատապարտուին”,- ըսած է ԵԽԽՎ իրաւաբանական յանձնաժողովի նախագահը: Ֆրանսացի խորհրդարանական Ֆրանսուա Ռոշպլուան յայտարարած է, որ այս գործը կը վերաբերի ողջ Եւրոպային: “Ամօթ Հունգարիային, ամօթ Եւրոպային: Սաֆարովի հարցը խայտառակութիւն է մեզի համար”,- ըսած է Ռուշպլուան:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button