ՍՓԻՒՌՔԱՀԱՅ ԼՐԱՏՈՒԱՄԻՋՈՑՆԵՐՈՒ ՂԵԿԱՎԱՐՆԵՐԸ ՍՓԻՒՌՔԻՆ ԱՒԵԼԻ ՇԱՏ ԱՆԴՐԱԴԱՌՆԱԼՈՒ ԿՈՉ Կ’ՈՒՂՂԵՆ

 Հայաստանեան լրատուամիջոցները աւելի շատ ուշադրութիւն կը դարձնեն երկրի կեանքին տեղի ունեցող, իրականութեան մէջ ոչ կարեւոր դէպքերու, քան Սփիւռքին: Այս մասին, ըստ Panorama.am-ի, այսօրուան ասուլիսին ժամանակ ամփոփելով Երեւանի մէջ տեղի ունեցած Լրագրողներու համահայկական 6-րդ համաժողովի արդիւնքները` մտահոգութիւն յայտնած են Սփիւռքի հայկական շարք մը յառաջատար լրատուամիջոցներու ղեկավարներ:

Ասուլիսին ներկայ եղած են Աբօ Պողիկեան «Ասպարէզ» օրաթերթ (ԱՄՆ), Ժիրայր Չօլաքեան «Նոր յառաջ» երկօրեայ թերթ (Ֆրանսա), Համբիկ Մարտիրոսեան «Խօսնակ» ամսագիր (Լիբանան), Շահան Գանտահարեան «Ազդակ» օրաթերթ (Լիբանան), Վերա Սիսերեան «Սեւան» ռատիօ (Լիբանան), Մաքրուհի Յակոբեանը «Նոր Մարմարա» օրաթերթ (Թուրքիա) եւ Դերենիկ Մելիքեան «Ալիք» օրաթերթ (Իրան):

Բանախօսները շատ կարեւոր համարած են համահայկական 6-րդ համաժողովին ընթացքին քննարկուած հարցերը, մանաւանդ, որ անոնք կը վերաբերէին նաեւ Հայոց Ցեղասպանութեան 100-ամեակի ձեռնարկներու ծիրին մէջ նախատեսուած գործողութիւններուն: Նշուած է, որ սփիւռքահայ լրատուամիջոցները պատրաստ են իրենց ներդրումը ունենալու այդ գործին մէջ:

Լրատուամիջոցներու ղեկավարները ընդգծած են, որ հայ համայնքներուն մէջ մեծ ուշադրութեամբ կը հետեւին Հայաստանի եւ Արցախի մէջ տեղի ունեցող իրադրութիւններուն, յատկապէս քաղաքական եւ հասարակական դաշտի մէջ, սակայն իրենց կը յուզէ այն փաստը, որ եթէ իրենք մեծ տեղ կը յատկացնեն հայաստանեան անցուդարձին, Հայաստանի մէջ սփիւռքը գրեթէ կ’անտեսուի:

«Մենք շատ կարեւոր կը համարենք Հայաստանէն եկած լրահոսը, եւ մեծ տեղ կը յատկացնենք այստեղէն եկած տեղեկատւութեան, սակայն շատ անգամ անիկա լեցուած է այնպիսի զարհուրելի դէպքերով` օրինակ, ինչպէս փորձած են բռնաբարել 71 տարեկան կնոջ, քրէական այլ պատահարներ, կամ ով որուն ինչ ըսած է: Նման տեղեկատւութիւնները մեր ազգին պատիւ չեն բերեր: Այստեղ շատ քիչ է նաեւ համապետական կամ համազգային նշանակութեան տեղեկատւութիւնը»,- նշած է Աբօ Պողիկեան:

Իբրեւ յաւելում իր գործընկերոջ` Դերենիկ Մելիքեան նշած է, որ «Ալիք» օրաթերթին մէջ Հայաստանի եւ Արցախեան հիմնահարցին մեծ ուշադրութիւն դարձնելուն պատճառով` յաճախակի քննադատութիւն կը հնչէ, թէ ատիկա որքան կը ծառայէ իրանահայ համայնքին:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button
 

STAINLESS STEEL

 

–>