ՆԱԽԱԳԱՀ ՍԱՐԳՍԵԱՆ ԿԸ ՄԱՍՆԱԿՑԻ «ՀԱՄԱՇԽԱՐՀԱՅԻՆ ԺԱՌԱՆԳՈՒԹԵԱՆ ՔԱՂԱՔՆԵՐ» ԽՈՐՀՐԴԱԺՈՂՈՎԻՆ

 ԵՈՒՆԵՍՔՕ-ի «Համաշխարհային ժառանգութեան քաղաքներ» կազմակերպութեան ընդհանուր  խորհրդաժողովը եւ տնօրէններու խորհուրդի նիստը իր աշխատանքները սկսած է Հոկտեմբեր 7-ին, Էջմիածինի մէջ: Ժողովը կ’ընթանայ Հայաստանի հոգեւոր մայրաքաղաքի 2697-ամեակին նուիրուած տօնակատարութիւններուն ծիրէն ներս: Եռօրեայ նիստին բացման հանդիսաւոր արարողութեան ներկայ եղած է նաեւ ՀՀ նախագահ Սերժ Սարգսեան:

«Մեր օրհնութիւնն ենք տալիս, շնորհաւորանքներն ու բարեմաղաթանքները, ուրախ եմ, որ տօնի շրջանակներում, իր ներկայութամբ պատուել է ՀՀ նախագահը, ով զօրակցում է Էջմիածնի եւ պետութեան միջեւ յարաբերութունների ամրապնդմանը»,- իր խօսքին մէջ ըսած է Ն.Ս.Օ.Տ.Տ Գարեգին Բ. Ամենայն Հայոց Կաթողիկոսը: Վեհափառի խօսքով` պատմական քաղաքներուն նիստը նուիրական է, քանի որ Հայաստանի հոգեւոր եւ մտաւոր ծաղկունքը սկսած է Էջմիածինէն, ուր դարեր շարունակ համախմբուած են կաթողիկոսները, ուր կը շարունակեն այցելել բազմաթիւ հայորդիներ աշխարհի տարբեր անկիւններէ: «Այս սրբավայրում է գտնւում հայ ժողովրդի սիրտը, լինել Էջմիածնի բնակիչ` պատիւ է եւ պատասխանատւութիւն»,- աւելցուցած է Ամենայն Հայոց Կաթողիկոսը:

ՀՀ մշակոյթի նախարար Յասմիկ Պօղոսեան` իր հերթին` նշած է, որ Էջմիածինը առանձնայատուկ նշանակութիւն ունի հայ մշակութային կեանքին մէջ, քանի որ քաղաքը առաջինը դարձած է հոգեւոր կեդրոն, այստեղ հիմնադրուած է առաջին մեսրոպեան դպրոցը, առաջին Մատենադարանը, գրչութեան առաջին կեդրոնը, թուղթի գործարանը: «էջմիածինը ոչ միայն հայաստանցիների համար է կարեւոր կեդրոն, այլեւ սփիւռքահայերի համար. այն ինքնութեան հաստատմամ միջոց է, վայր, որը դարձաւ ամենախոշոր սրբավայրը»,- նշած է նախարարը:

«Մեզի համար մեծ պատիւ է եւ հաճոյք, որ հեթական նիստը տեղի կ’ունենայ Էջմիածինի մէջ»,- յայտարարած է ՀԺՔԿ նախագահ եւ հոլանտական Պիմսթըրի քաղաքապետ Հարի Պրինքման:

Ժողովին ընթացքին` Ամենայն Հայոց Կաթողիկոսին Էջմիածինի քաղաքապետին կողմէ շնորհուած է Էջմիածին քաղաքի «պատուաւոր քաղաքաց»-ի կոչում, իսկ Քէպէքի ՀԺՔԿ գլխաւոր քարտուղար Տենիս Րիգարտին` Էջմիածին քաղաքի «բարեկամ»-ի կոչում:

Հայաստանը «Համաշխարհային ժառանգութեան քաղաքներ» կազմակերպութեան կ’անդամակցի 2007-էն ի վեր, իսկ 2011-ին ստացած է իսկական անդամի կարգավիճակ: Կազմակերպութեան կ’անդամակցի 238 քաղաք: Կառոյցին անդամ են նաեւ Երեւանն ու Գորիսը:

Էջմիածինի մէջ կառուցուած է քրիստոնէական հնագոյն եկեղեցիներէն մէկը` Էջմիածինի մայր տաճարը 301-303-ին եւ այստեղ է, որ առաջին անգամ աշխարհի մէջ քրիստոնէութիւնը ընդունուած է իբրեւ պետական կրօն: Ներկայիս Էջմիածինի իւրայատուկ պաշտամշակութային զարգացումը թելադրուած է յատկապէս հոգեւոր կեդրոն ըլլալով: Մայր Աթոռ Սուրբ Էջմիածինը Հայ Առաքելական եկեղեցւոյ հոգեւոր եւ վարչական կեդրոն է: Այստեղ կը գտնուի հայ ժողովուրդի ու անոր հաւատքի խորհրդանիշ Մայր տաճարը: Քաղաքին մէջ կայ վանքային վեց համալիրներ` կառուցուած 4-5-րդ դարերուն, անոնք ընդգրկուած են ԵՈՒՆԵՍՔՕ-ի համաշխարհային ծառանգութեան արժէքներու ցանկին մէջ: Էջմիածինի տարածքը 4424 հա է, բնակչութիւնը 57.600: Հեռաւորութիւնը Երեւանէն 18 քմ:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button