ՀՈՒՆԳԱՐԻՈՅ ԺՈՂՈՎՈՒՐԴԸ ՄԵՐ ԹՇՆԱՄԻՆ ՉԷ, ՀԱԿԱՌԱԿ ՀՈՒՆԳԱՐԻՈՅ ԿԱՌԱՎԱՐՈՒԹԵԱՆ ԱՌԱԾ ՍԽԱԼ ՈՐՈՇՈՒՄԻՆ» ՍԵՐԺ ՍԱՐԳՍԵԱՆ

 

Հունգարիոյ ժողովուրդը մեր թշնամին չէ, հակառակ այն սխալ որոշումին, որ ընդունած է պաշտօնական Պուտափեշտը: Այս մասին կը տեղեկացնէ Armenpress.am-ը՝ վկայակոչելով ՀՀ նախագահի տուած բացառիկ հարցազրոյցը հունգարական ATV հեռատեսիլի ընկերութեան: ՀՀ նախագահը անդրադարձած է հայ-հունգարական յարաբերութիւններուն, ԼՂ հիմնահարցի կարգաւորման եւ Սաֆարովի արտայանձման հարցերուն:

«Մենք դա սխալ որոշում ենք համարում»,- ըսած է Սարգսեան` անդրադառնալով Սաֆարովի արտայանձման հունգարական քայլին: ՀՀ նախագահը Ատրպէյճանի վարած քաղաքականութեան մէջ չի տեսներ Լեռնային Ղարաբաղի հակամարտութեան խաղաղ կարգաւորման ձգտում, սակայն «Հայաստանն ամէն հնարաւորն անում է հասնելու այդ նպատակին»: Նախագահը միեւնոյն ժամանակ ընդգծած է, որ Լեռնային Ղարաբաղի դէմ Ատրպէյճանի կողմէ ռազմական յարձակման պարագային Հայաստանը պիտի պաշտպանէ Լեռնային Ղարաբաղի քաղաքացիները:

ՀՀ նախագահը նկատած է, որ Հունգարիոյ կառավարութիւնը գիտակցած է որոշման հետեւանքները, իսկ այդ երկրի բարձրաստիճան պաշտօնեաները ամիսներ շարունակ կը հաւաստիացնէին Հայաստանին, թէ Սաֆարովը պիտի չարտայանձնուի: «Ես չէի ցանկանայ, որ հայ ժողովուրդը հունգար ժողովրդին մէջքով շրջուէր այնպէս, ինչպէս հունգարական կառավարութիւնն արեց հայ ժողովրդի նկատմամբ»,- եզրափակած է ՀՀ նախագահ Սերժ Սարգսեան:

ՀՀ նախագահը ընդգծած է, որ հայ եւ հունգար ժողովուրդներուն միջեւ միշտ եղած են լաւ յարաբերութիւններ, մշտապէս եղած են հայ հերոսներ, որոնք իրենց կեանքը զոհած են Հունգարիոյ անկախութեան համար: Նախագահը շեշտած է, որ անհրաժեշտութեան պարագային նման հերոսներ կրկին պիտի ըլլան: Սերժ Սարգսեանի խօսքով` Սաֆարովը արտայանձնելու վերաբերեալ Հունգարիոյ կառավարութեան որոշումը աւելի սրած է հայ-ատրպէյճանական հակամարտութիւնը` միեւնոյն ժամանակ վնաս հասցնելով նաեւ Եւրոպական Միութեան արեւելեան քաղաքականութեան:

Նշենք, որ 2004 Փետրուար 19-ին Պուտափեշտի մէջ ատրպէյճանցի ոճրագործ սպայ Ռամիլ Սաֆարովը կացինահարեց Հայաստանի ԶՈւ սպայ Գուրգէն Մարգարեանը` քնացած ժամանակ: Սպաները Հունգարիոյ մայրաքաղաքին մէջ կը մասնակցէին անգլերէնի դասընթացներուն` ՆԱԹՕ-ի ծրագիրին ծիրէն ներս: Հունգարիոյ դատարանը դատապարտեց Ռամիլ Սաֆարովը ցմահ բանտարկութեան` առանց ներման իրաւունքի առաջին 30 տարիներուն: 2012 Օգոստոս 31-ին Հունգարիոյ իշխանութիւնները որոշում կայացուցին արտայանձնել Սաֆարովը Ատրպէյճանին: Ատրպէյճան արտայանձնուելէն ետք` ոճրագործը արժանացաւ նախագահ Իլհամ Ալիեւի ներման, անոր շնորհեցին հարիւրապետի կոչում, ապահովեցին բնակարանով, անձնագիրով եւ հերոսացուցին: Հայաստանը կասեցուց դիւանագիտական յարաբերութիւնները եւ պաշտօնական կապերը Հունգարիոյ հետ:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button

 

STAINLESS STEEL