ՀԱՅ-ՌՈՒՍԱԿԱՆ ՄԻՋԿԱՌԱՎԱՐԱԿԱՆ ՆԻՍՏ ԵՐԵՒԱՆԻ ՄԷՋ

 Հայ-ռուսական միջկառավարական յանձնաժողովի հերթական նիստը տեղի պիտի ունենայ Երեւանի մէջ Հոկտեմբեր 12-ին:
Նիստը պիտի նախագահեն յանձնաժողովի համանախագահներ ՀՀ վարչապետ Տիգրան Սարգսեանն ու ՌԴ փոխադրամիջոցի նախարար Մաքսիմ Սոգոլովը: Իկոր Լեւիդինը ՌԴ փոխադրամիջոցի նախարարի պաշտօնին փոխարինելէն ետք` Սոգոլով առաջին անգամ ըլլալով պիտի մասնակցի Հայ-ռուսական տնտեսական համագործակցութեան միջկառավարական յանձնաժողովի նիստին: Այս մասին, ըստ Armenpress.am-ի, այսօր հրաւիրուած ասուլիսին ընթացքին նշած է ՀՀ-ի մօտ Ռուսաստանի Դաշնութեան արտակարգ եւ լիազօր դեսպան Վեաչեսլաւ Գովալենգոն` տեղեկացնելով, որ յանձնաժողովը պիտի քննարկէ երկկողմ յարաբերութիւններու ամենաարդիական հարցերը` սկսեալ տնտեսական, ռազմաճարտարագիտական համագործակցութենէն մինչեւ մշակութային կապեր:

«Հայ-ռուսական յարաբերութիւնները զարգացման բարձր մակարդակի վրայ են: Նման գնահատականը բնորոշ է երկկողմ գործակցութեան ողջ երեւոյթին»,- ըսած է դեսպանը:

Երեւանի մէջ նաեւ պիտի կայանայ հայ-ռուսական միջտարածաշրջանային երկրորդ ֆորումը: Նախորդ տարի հիմք դրուած ձեռնարկը, Գովալենգոյի գնահատմամբ, Հայաստանի Հանրապետութեան եւ Ռուսաստանի Դաշնութեան տարածաշրջաններուն միջեւ գործակցութեան մեծ թափ հաղորդած է: Երկրորդ ֆորումին արդէն իսկ մասնակցութեան հետաքրքրութիւն ներկայացուցած են ՌԴ 16 տարածաշրջաններու պատուիրակութիւններ` նահանգապետերու, տարբեր գերատեսչութիւններու ղեկավարներու գլխաւորութեամբ: Հայաստան ժամանող բոլոր հիւրերը պիտի ուղեւորուին մարզեր` տեղւոյն վրայ առեւտրատնտեսական կապերու ընդլայնման հնարաւորութիւններուն ծանօթանալու նպատակով:

Դեսպանին տեղեկութիւններով` Հայաստանի մէջ տեղի պիտի ունենայ նաեւ «Ռուսերէն խօսքի 5 օրեր» ձեռնարկը` մէկտեղելով ռուսախօս տարբեր մասնագէտներ` քննարկելու կրթական, մեթոտոլոկիական, մշակութային համագործակցութեան խնդիրներ: Երեւանի մէջ պիտի բացուի «Ռուսական գիրքի տուն» երրորդ ձեռնարկը, որ եւս ոչ միայն գիրքի վաճառքի լաւագոյն հնարաւորութիւն է, այլեւ կրթական, մշակութային լրջագոյն ձեռնարկ:

Հայաստանի Հանրապետութեան եւ Ռուսաստանի Դաշնութեան միջեւ դիւանագիտական յարաբերութիւնները հաստատուած են 1992 Ապրիլ 3-ին: ՌԴ դեսպանութիւնը Երեւանի մէջ կը գործէ 1992-էն ի վեր, իսկ ՀՀ դեսպանութիւնը Մոսկուայի մէջ` 1994-էն ի վեր:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button

 

STAINLESS STEEL