Ատրպէյճան Եւ Թուրքիա Կը Շարունակեն Դէմ Արտայայտուիլ Արցախի Օդակայանին

Ատրպէյճան կը շարունակէ արտայայտել իր «մտահոգութիւնները», Լեռնային Ղարաբաղի մայրաքաղաք Ստեփանակերտի օդակայանի բացման կապակցութեամբ: Ատրպէյճանի արտաքին գործոց նախարարութեան մամլոյ խօսնակ Էլման Ապտուլլաեւ Երեքշաբթի, Հոկտեմբեր 9ին դժգոհութիւն յայտնած է օդակայանին մէջ օտար ընկերութիւններու գործունէութեան կապակցութեամբ՝ անդրադառնալով յատկապէս ֆրանսական «Tales» ընկերութեան:
Յայտարարելով, որ սոյն ընկերութիւնն անմիջապէս պէտք է դադրեցնէ իր գործունէութիւնը օդակայանին մէջ՝ ան սպառնացած է, որ այլապէս Ատրպէյճան կրնայ «ընկերութեան նկատմամբ համարժէք քայլեր»ու դիմել:
Իր կարգին, Թուրքիոյ արտաքին գործոց նախարարութիւնը յայտարարած է, որ «խիստ քննադատելի» է Լեռնային Ղարաբաղի Հանրապետութեան մայրաքաղաքի օդակայանին բացումը՝ աւելցնելով, թէ նման քայլ մը վնաս պիտի հասցնէ ղարաբաղեան տագնապի խաղաղ լուծման:
Այդ պատճառով, Թուրքիա «խստօրէն կը դատապարտէ Հայաստանի ապօրինի գործողութիւնները եւ կոչ կ՛ուղղէ հրաժարելու այնպիսի քայլերէ, որոնք կրնան ազդել շրջանի կայունութեան վրայ», նշուած է Թուրքիոյ արտաքին գործոց նախարարութեան յայտարարութեան մէջ:
Ատրպէյճանական «Էյ.Փի.Էյ.» լրատու գործակալութիւնը, վկայակոչելով դիւանագիտական աղբիւրներ՝ նաեւ կը հաղորդէ, որ Թուրքիա կրնայ Հայաստանի առջեւ իր օդային տարածքը փակել, եթէ հայերը դէպի «գրաւուած ատրպէյճանական հողեր» թռիչքներ կատարեն:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button