«Էրեբունի-Երեւան-2794»ի Տօնական Հանդիսութիւններ

 Երեւանի քաղաքապետի խորհրդական Արամ Սուքիասեան ներկայացուցած է «Էրեբունի-Երեւան 2794» հանդիսութիւններու ծիրին մէջ 14 Հոկտեմբերին նախատեսուած տօնական ձեռնարկներու ծրագիրը: Կը նախատեսուի, որ Երեւանի ծննդեան տարեդարձին նուիրուած հանդիսութիւնները այս տարի կայանան մեծ շուքով։ Այս առիթով մայրաքաղաք պիտի ժամանեն գործընկեր եւ քոյր քաղաքներու, ինչպէս նաեւ հանրապետութեան մարզերու մեծ թիով պատուիրակութիւններ: Տօնական հանդիսութիւնները պիտի սկսին 9-10 Հոկտեմբերին՝ պատմական եւ ժամանակակից Երեւանի մասին պատմող ցուցահանդէսներով:
Հոկտեմբեր 14-ին նախատեսուած նախաձեռնութիւններու տօնական ուրախ մթնոլորտը պիտի թեւածէ մայրաքաղաքի բոլոր վարչական շրջաններուն մէջ: Բազմաբնոյթ ու բազմաբովանդակ հանդիսութիւններ պիտի կատարուին 26 բեմահարթակներու վրայ: Այդ օրը փոքր կեդրոնը երթեւեկութեան համար փակ պիտի ըլլայ առաւօտեան ժամը 8:30-էն սկսեալ: Նախ ջրցան մեքենաներով պիտի մաքրուին Երեւանի փողոցները, այնուհետեւ համալսարաններու ուսանող կամաւորներու օգնութեամբ պիտի լուացուին յուշարձանները, որմէ ետք պիտի սկսին բուն տօնական հանդիսութիւնները: Մեկնարկը պիտի տրուի թատերական ներկայացումով՝ «Էրեբունի» արգելոց–թանգարանի յարակից հրապարակէն:
Ժամը 2։00-ին (Երեւանի ժամանակացոյցով) Ռուսիոյ հրապարակէն պիտի սկսի տօնական շքերթը, որուն մասնակիցները՝ Երեւանի քաղաքապետ Տարօն Մարգարեանի ողջոյնի խօսքէն ետք, երթով պիտի ուղղուին Հանրապետութեան հրապարակ: Այդ օրը պիտի յայտարարուի նաեւ մայրաքաղաքի նոր պատուաւոր քաղաքացիներու անունները: Նկատի ունենալով նաեւ, որ 2012 թուականին Երեւանի՝ գիրքի համաշխարհային մայրաքաղաք ըլլալու տարի է, պիտի կազմակերպուին բացօթեայ գրական ցերեկոյթներ: Տեղի պիտի ունենան մարզամշակութային բազմաթիւ նախաձեռնութիւններ։
Աւանդութեան համաձայն՝ օրուան գլխաւոր հանդիսութիւնը, որ այս տարի կը կրէ «Իմ սրտի մայրաքաղաք» խորագիրը, տեղի պիտի ունենայ Հանրապետութեան հրապարակին վրայ եւ պիտի սկսի ժամը 19:00-ին: Երեկոյին գեղարուեստական բաժինին իրենց մասնակցութիւնը պիտի բերեն նաեւ արտերկրէն ժամանած յայտնի խումբեր ու ճանչցուած երգիչներ:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button