Ճակատում Չենք Փափաքիր, Սակայն Սուրիական Հողերու Իւրաքանչիւր Հատիկը Պիտի Պաշտպանենք. Սուրիոյ ԱԳՆ

 Սուրիոյ արտաքին գործոց նախարարութեան բանբեր Ժիհատ Մաքտիսի երէկ «Վանայ ձայն»-ի հետ զրոյցի մը ընթացքին պատասխանելով Թուրքիոյ վարչապետ Ռեճէփ Թայիփ Էրտողանի այն յայտարարութեան, թէ Սուրիոյ հետ «ճակատումի կանոնները փոխեցինք», ըսաւ, որ «մենք ճակատում չենք փափաքիր», սակայն շեշտեց, որ «սուրիական հողերու իւրաքանչիւր հատիկը պիտի պաշտպանենք»: Այս մասին կը յայտնէ ՙԱզդակ՚ օրաթերթը։

Մաքտիսի ըսած է, որ Թուրքիոյ հետ յարաբերութեան մէջ «մենք իրաւունքներ եւ պարտաւորութիւններ ունինք: Յանձնառու կը մնանք բարի դրացիական յարաբերութիւններուն», սակայն անոնց պահպանման համար երկու կողմերուն ալ յանձնառութեան կարիքը կայ, «եւ այդ մէկը ներկայիս թրքական այժմու կառավարութեան կողմէ չենք տեսներ»:

Ինչ կը վերաբերի Թուրքիոյ արտաքին գործոց նախարար Ահմէտ Տաւուտօղլուի այն առաջարկին, թէ Սուրիոյ փոխնախագահ Ֆարուք Շարեհ պէտք է փոխարինէ նախագահ Պաշշար Ասատը, Մաքտիսի ըսաւ, որ «երբ Թուրքիա մեզի արտօնէ յայտնելու, թէ ո՛ր կառավարութիւնը իրեն աւելի օգտակար է, ապա կ՛արտօնենք, որ ինք եւս այդ մէկը մեզի ըսէ»` նշելով, որ ներկայ հարցին մէջ վճիռը սուրիացի ժողովուրդին կը պատկանի:

Ան նաեւ ըսաւ, որ «սուրիական բանակը ինքնապաշտպանութեան վիճակի մէջ է»` նշելով, որ «երբ հրացանաձգութիւն, հրթիռարձակում եւ ականահարումներ տեղի կ՛ունենան, ապա անոնք ազատութեան պահանջներ չեն»:

Ինչ կը վերաբերի ՄԱԿ-ի ընդհանուր քարտուղար Պան Քի Մունի կողմէ սուրիական կառավարութեան ուղղուած միակողմանի զինադադարի եւ հանդարտեցումի կոչին, ան ըսաւ, որ «հանդարտեցումը ինքնանպատակ չէ, այլ դէպի քաղաքական երկխօսութիւն անցումի պատրաստութիւն», հարցականի տակ առնելով այդ հանդարտեցման նպատակը, եթէ հակառակորդ կողմը Սուրիոյ մէջ վարչակարգին հետ քաղաքական երկխօսութիւնը կը մերժէ: «Ընդհանուր քարտուղարի բարի կամեցողութեան համար շնորհակալ ենք, սակայն բարի կամեցողութիւնը երբեմն դժոխք կ՛առաջնորդէ» ըսած է Մաքտիսի:

Սուրիոյ արտաքին գործոց նախարարութեան բանբերը ընդգծեց, որ Սուրիոյ մէջ ապահովական լուծում չկայ եւ այն, ինչ որ ներկայիս տեղի կ՛ունենայ, «ապահովական դարմանում» է:

«Վճռումը սուրիացիին վրայ սուրիացիին արձանագրած յաղթանակ չի նշանակեր, այլ կ՛ուզենք զէնք բարձրացուցած այդ սուրիացիին համոզել, որ իր պահանջները զէնք բարձրացնելով չի կրնար իրագործել», ըսած է ան:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button