Երեւանի Քաղաքապետարանը Պիտի Աշխոյժացնէ Համաշխարհային Պատմական Ժառանգութեան Քաղաքներու Կազմակերպութեան Հետ Գործակցութիւնը

0
16

Համաշխարհային պատմական ժառանգութեան քաղաքներու կազմակերպութեան եւ անդամակից Երեւանի համագործակցութեան սերտացման հեռանկարները քննարկուած են Երեւանի քաղաքապետ Տարօն Մարգարեանի եւ կազմակերպութեան նախագահ, Հոլանտայի Պիմսթըր քաղաքի քաղաքապետ Հարրի Պրինքմանի Հոկտեմբեր 9-ի հանդիպման ընթացքին: Այս մասին կը հաղորդէ Երեւանի քաղաքապետարանի տեղեկատւութեան եւ հասարակայնութեան հետ կապերու վարչութիւնը: Հանդիպման մասնակցած են նաեւ Հոկտեմբեր 7-8 Էջմիածինի մէջ իրականաց Տնօրէններու խորհուրդի նիստին պատուիրակները:

Շնորհակալութիւն յայտնելով այցելութեան համար` Տարօն Մարգարեան կարեւոր համարած է Երեւանի անդամակցութիւնը Համաշխարհային պատմական ժառանգութեան քաղաքներու կազմակերպութեան եւ նկատած, որ պատմամշակութային արժէքներու պահպանութիւն գործին մէջ ցանկալի արդիւնաւէտութեան համար անհրաժեշտ է աշխոյժացնել գործակցութիւնը: “2006 թուականից, “Համաշխարհային պատմական ժառանգութեան քաղաքների կազմակերպութեանը” անդամակցելուց ի վեր մեր համագործակցութիւնը կարծում եմ բաւարար չէ: Երեւանի քաղաքապետարանը կարեւորում է “համաշխարհային պատմական ժառանգութեան քաղաքներ” կազմակերպութեան դերն ու նպատակները, եւ կարծում եմ պէտք է սերտացնենք համագործակցութիւնը` լրացնելով բացթողածը: Մի քանի օրից նշելու ենք Էրեբունի-Երեւանի 2794-ամեակը: Երեւանը պատմամշակութային հարուստ ժառանգութեամբ քաղաք է, որտեղ մեր խնդիրը հին, պատմամշակութային տարածքները պահպանելով` նոր մօտեցումներով քաղաք կառուցելն է”,- նշած է Երեւանի քաղաքապետը:

Տարօն Մարգարեանին ներկայացնելով կազմակերպութեան յաջողած ծրագիրները` հիւրերը նկատած են, որ Համաշխարհային պատմական ժառանգութեան քաղաքներու կազմակերպութեան հետ համագործակցութիւնը Երեւանին միջազգային ճանաչման յաւելեալ հնարաւորութիւն պիտի ընձեռէ եւ պատմամշակութային արժէքներու պահպանման հարցեր ներկայացնելու լայն հարթակ դառնայ: Համաշխարհային պատմական ժառանգութեան քաղաքներու կազմակերպութեան նախագահը Երեւանի քաղաքապետը հրաւիրած է մասնակցելու կազմակերպութեան խորհուրդի` 2013 Նոյեմբերին Մեքսիքոյի մէջ կայանալիք նիստին:

Համաշխարհային պատմական ժառանգութեան քաղաքներու կազմակերպութեան հիմքը ԵՈՒՆԵՍՔՕ-ի համաժողովի` համաշխարհային մշակութային եւ բնական ժառանգութեան պահպանման հռչակագիրն է: Կազմակերպութեան կ’անդամակցի 238 քաղաք, ուր կը գտնուին այնպիսի վայրեր, որոնք ներառուած են ԵՈՒՆԵՍՔՕ-ի Համաշխարհային ժառանգութեան ցանկին մէջ:

LEAVE A REPLY

Please enter your comment!
Please enter your name here