ԼՂՀ ԱԳՆ Պատասխանը Ատրպէյճանին Տարածուած է ՄԱԿ-ի Գլխաւոր Ասամպլէայի եւ ԱԽ-ի Մէջ

ՄԱԿ-ի Գլխաւոր ասամպլէայի եւ Անվտանգութեան խորհուրդի մէջ տարածուած է Լեռնային Ղարաբաղի Հանրապետութեան արտաքին գործոց նախարարութեան պատասխանը` ՄԱԿ-ի մէջ Ատրպէյճանի ներկայացուցիչի նամակներուն, որ կը վերաբերի 19 Յուլիս 2012-ին կայացած ԼՂՀ նախագահական ընտրութիւններուն: Այս մասին կը հաղորդէ ԼՂՀ ԱԳ նախարարութեան մամուլի ծառայութիւնը:

Փաստաթուղթին մէջ նշուած է, որ ազատ եւ թափանցիկ կամարտայայտման հիման վրայ` պետական կառոյցներու ձեւաւորումը դարձած է Հանրապետութեան քաղաքական մշակոյթի անքակտելի մասը:

Պատասխանին մէջ նաեւ ընդգծուած է, որ 19 Յուլիս 2012-ին ԼՂՀ-ի մէջ կայացած նախագահական ընտրութիւնները եւս մէկ քայլ են երկրին մէջ ժողովրդավարական աւանդոյթներու եւ համընդհանուր արժէքներու ամրապնդման ճանապարհին, որ կը հաստատուի միջազգային դիտորդներու, ինչպէս` Եւրոպական խորհրդարանի պատգամաւորներու, լրագրողներու եւ հասարակական գործիչներու կողմէ տրուած բարձր գնահատականներով:

«Լեռնային Ղարաբաղի Հանրապետութիւնը լիայոյս է, որ միջազգային հանրութիւնը պատշաճ կերպով պիտի արձագանգէ երկրին մէջ իրականացուող ժողովրդավարական գործընթացներուն, որ հերթական իրական ազդանշան պիտի դառնայ մոլորակի տարբեր տարածաշրջաններու այն երկիրներուն համար, որոնք ընտրած են ժողովրդավարութեան ուղին:

Ատրպէյճանի կողմէ հնչող իւրաքանչիւր պնդում, թէ Լեռնային Ղարաբաղի Հանրապետութեան ժողովրդավարական զարգացումը կ’արգելակէ խաղաղ գործընթացը, անտրամաբանական են եւ հետամուտ են միայն մէկ նպատակի` շեղել միջազգային հանրութեան ուշադրութիւնը այն իրական խոչընդոտներէն, որոնք առկայ են բանակցային գործընթացին ծիրէն ներս»,- մասնաւորապէս, ըսուած է ԼՂՀ ԱԳՆ նամակին մէջ:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button