ԱԱԾ-ն Բացայայտած է Ատրպէյճանի Յատուկ Ծառայութիւններու Հերթական Սադրիչ Գործունէութեան Փորձը

 Հայաստանի ԱԱԾ մարմիններուն կողմէ բացայայտուած եւ կանխուած է Ատրպէյճանի յատուկ ծառայութիւններու հերթական սադրիչ գործունէութեան փորձը: Այս մասին կը տեղեկանեն ԱԱԾ մամուլի կեդրոնէն:

Սեպտեմբեր 24-ին ՀՀ իրաւապահ մարմիններուն դիմած է Ուզպեքստանի քաղաքացի, տաճիկ, 1979-ի ծնունդ Զամիրժոն Օդաժոնովը, որ յայտնած է, թէ պատրաստ է 20.000 ԱՄՆ տոլարի դիմաց պայթիւններու տեսքով ահաբեկչական գործողութիւններ է կատարել Ատրպէյճանի մայրաքաղաքին մէջ: Իր խօսքերը Զ. Օդաժոնովը հիմնաւորած է ըսելով, թէ 2012-ի ընթացքին աշխատած է Պաքու քաղաքի շինարարական կազմակերպութիւններէն մէկուն մէջ, սակայն տուեալ կազմակերպութեան տնօրինութիւնը հրաժարած է վճարել իրեն կատարուած աշխատանքին դիմաց, որուն պատճառով ալ անոր մօտ ատելութիւն յառաջացած է ատրպէյճանցիներուն հանդէպ:

Ձեռնարկուած հետախուզական քայլերուն իբրեւ արդիւնք պարզուած է, որ վերջինս ՀՀ ԱԱԾ մարմիններուն դիմած է Ատրպէյճանի յատուկ ծառայութիւններու ուղղորդմամբ եւ անոր գործողութիւնները ուրիշ բան չեն, քան սադրանք: Ատրպէյճանական կողմի այս քայլերը նպատակ հետապնդած են միջազգային տարբեր ատեաններու եւ ԶԼՄ-ներու մէջ իրականացուող հակահայկական քարոզչութեան համար Հայաստանը ներկայացնելու իբրեւ ահաբեկչական գործողութիւններ կազմակերպող եւ հովանաւորող երկիր:

Ուշագրաւ է, որ Զ. Օդաժոնովը Հայաստան ուղարկելը կազմակերպուած է Ատրպէյճանի իշխանութիւններուն կողմէ մարդասպան Ռամիլ Սաֆարովը ազատ արձակելու եւ հերոսացնելու իբրեւ արդիւնք քաղաքական դժուար իրավիճակի մէջ յայտնուելու ժամանակաշրջանին:

Այսպիսով, Ատրպէյճանի համապատասխան մարմինները փորձած են ուղղակիօրէն օգտագործել Զ. Օդաժոնովը` միջազգային հանրութեան մէջ Ռ. Սաֆարովին շուրջ ստեղծուած դժգոհութեան ալիքը մեղմելու նպատակով: Հակառակ այն հանգամանքին, որ Հայաստան բազմիցս յայտարարած եւ ապացուցած է, որ ահաբեկչական իւրաքանչիւր գործողութիւն անընդունելի եւ դատապարտելի է, սակայն, այդուհանդերձ` ատրպէյճանական կողմը իր գործած յանցանքները հնարաւորինս կոծկելու համար` դիմած է նման անհեթեթ արկածախնդրութեան:

Զ. Օդաժոնովը վտարուած է Հայաստանի Հանրապետութենէն:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button

 

STAINLESS STEEL