ԱԱԾ-ն «ՍիՎիլիթաս»-ի Փաստաթուղթերը Առգրաւելու Որոշում Ընդունած է

Ազգային անվտանգութեան ծառայութիւնը որոշում ընդունած առգրաւելու «Սիվիլիթաս» հիմնադրամի փաստաթուղթերը:

«Սիվիլինեթ»-ի հաղորդման համաձայն` հիմնադրամին տրամադրուած ԱԱԾ քննչական վարչութեան պետի տեղակալ Մ. Համբարձումեանի առգրաւում կատարելու մասին որոշման մէջ նշուած է.

«Առգրաւել «Սիվիլիթաս» հիմնադրամին մէջ առկայ` ԱՄՆ-ի մէջ արձանագրուած «Հանթսման Ինթըրնէյշընըլ» եւ «Բոլիմըր Մաթիրյըլս Ինք.» ընկերակցութիւններուն կողմէ «Սիվիլիթաս» հիմնադրամին «Հանթսման Պիլտինկ Փրոտաքթս» ՍՊ ընկերութեան միջոցով` 577.897 ԱՄՆ տոլար եւ 11.494.000 դրամ, իսկ «Սիվիլիթաս» հիմնադրամի հիմնադիր եւ հոգաբարձուներու խորհուրդի նախագահ Վարդան Օսկանեանի միջոցով` 1.427.000 ԱՄՆ տոլար հիմնադրամին յատկացնելու, այդ գումարները հիմնադրամին կողմէ տիրապետելու, օգտագործելու եւ տնօրինելու վերաբերեալ փաստաթուղթերը, ներառեալ` հոգաբարձուներու խորհուրդի որոշումները, նշուած խորհուրդի նիստերու արձանագրութիւնները, գումարները յստակ ծրագիրներուն ուղղելու, ֆիզիքական անձերու մօտ ձգելու կամ անոնց տրամադրելու վերաբերեալ յանձնագիրերը կամ յայտարարութիւնները, ինչպէս նաեւ բոլոր այն փաստաթուղթերը, որոնք կրնան կապ ունենալ վերը նշուած երկու գործարքներուն հետ (բացառութեամբ վարչակառավարչական ծախսերը հիմնաւորող հաշուապահական փաստաթուղթերուն)»:

«Սիվիլիթաս» հիմնադրամէն կը տեղեկացնեն, որ ԱԱԾ քննիչները այսօր գացած էին «Սիվիլիթաս» հիմնադրամ` առգրաւելու Վարդան Օսկանեանին եւ «Սիվիլիթաս» հիմնադրամին առնչուող քրէական գործին վերաբերեալ փաստաթուղթերը:

Յիշեցնենք, որ յանցաւոր ճանապարհով եկած եկամուտները օրինականացնելու դէպքին առիթով ՀՀ կառավարութեան առընթեր ազգային անվտանգութեան ծառայութեան քննչական վարչութեան վարոյթին կողմէ քննուող քրէական գործով ՀՀ ԱԺ պատգամաւոր Վարդան Օսկանեանին Հոկտեմբեր 8-ին մեղադրանք ներկայացուած է առանձնապէս խոշոր չափերու իւրացում կատարելու եւ յանցաւոր ճանապարհով եղած` առանձնապէս խոշոր չափերու նոյնքան գումարի եկամուտները օրինականացնելու համար` ՀՀ քրէական օրէնսգիրքի 179-րդ յօդուածի 3-րդ մասի 1-ին կէտով եւ 190-րդ յօդուածի 3-րդ մասի 1-ին կէտով:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button