Սեւանի Գաւառ Քաղաքին Մէջ Հայրենիքի Նահատակ Զինուորներուն Նուիրուած Յուշահամալիր Բացուեցաւ

Սեւանի մարզի Գաւառ քաղաքի Հացառատ թաղամասին մէջ բացուած է Հայաստանի սահմաններու պաշտպանութեան համար զոհուած զինծառայողներու յիշատակը յաւերժացնող յուշահամալիր: «Արմենփրես»-ի փոխանցմամբ՝ յուշահամալիրը բաղկացած է երկու կառոյցներէ` հերոսներու պատուոյ յուշաքար` հերոսներու անուն-ազգանուններով, ապրած տարեթիւերով, եւ յիշատակի խաչքար: Յուշահամալիրը տեղակայուած է Հացառատի կեդրոնական հատուածին մէջ` շրջապատուած տաղաւարով եւ այգիով:

Յուշարձանին քանդակագործն է Գաւառի բնակիչ Մարատ Ասոյեանը: Քանդակին վրայ յաւերժագրուած են անունները այն հացառատցի ութ hերոսներուն, որոնք զոհուած են անկախ հայրենիքի սահմանները պաշտպանելու ընթացքին: Նորաբաց յուշարձանը օծուեցաւ ձեռամբ Գեղարքունեաց թեմի առաջնորդ Մարկոս եպիսկոպոս Յովհաննիսեանի կողմէ: Յիշատակի խաչքարին բացումը` հերոսի մահով ինկած զինուոր Զոհրապ Բալաբէկեանի հօր մասնակցութեամբ էր: Յուշահամալիրի բացման արարողութեան մասնակցած է Գեղարքունիքի փոխմարզպետ Անդրանիկ Յակոբեան, քաղաքի կրթական հաստատութիւններու տնօրէններ, Հայրենական մեծ պատերազմի եւ Արցախեան ազատամարտի վեթերաններ, դպրոցականներ, տարբեր երկիրներու եւ հանրապետութեան այլ վայրերու մէջ ապրող հացառատցիներ:

Յուշահամալիրի կառուցման նախաձեռնող հեղինակներէն Սերկէյ Յովհաննիսեան նշած է, որ Հացառատ թաղամասին մէջ յուշահամալիր ստեղծելու գաղափարը խումբ մը հայրենասէրներու վաղեմի ցանկութիւնը եղած է, սակայն այս տարի զոհուած երեք զինուորներու կորուստը զանոնք մղած է է նպատակը կեանքի կոչելու: Յուշահամալիրի ստեղծումին ներդրում ունեցած են բոլոր հացառատցիները:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button