Հայաստան-ԵՄ Համագործակցութեան Բոլոր Ոլորտներուն Մէջ Էական Յառաջընթաց Կայ

Պրիւքսէլի մէջ Հոկտեմբեր 8-ին տեղի ունեցած է Հայաստանի Հանրապետութիւն-Եւրոպական Միութիւն համագործակցութեան կոմիտէի 13-րդ նիստը: Այս մասին կը հաղորդէ ՀՀ տնտեսութեան նախարարութիւնը:

Հայկական կողմէն նիստը կը համանախագահէին ՀՀ տնտեսութեան նախարար Տիգրան Դաւթեան, եւրոպական կողմէն` Եւրոպական արտաքին յարաբերութիւններու ծառայութեան Ռուսաստանի, Արեւելեան գործընկերութեան, Կեդրոնական Ասիոյ, տարածաշրջանային համագործակցութեան եւ ԵԱՀԿ հարցերով տնօրէն Կունար Վիկանտը:

Նիստին ընթացքին կողմերը քննարկած են Եւրոպական հարեւանութեան քաղաքականութեան (ԵՀՔ) ծիրէն ներս ՀՀ-ԵՄ գործողութիւններու ծրագիրի իրականացման ընթացքը, ՀՀ-ԵՄ Ընկերակցութեան համաձայնագիրի եւ ՀՀ-ԵՄ խոր եւ համապարփակ ազատ առեւտուրի գօտիի (ԽՀԱԱԳ) ստեղծման շուրջ բանակցային գործընթացին զարգացումները, օրէնքի գերակայութեան, մարդու իրաւունքներուն եւ հիմնարար ազատութիւններուն, փոխադրամիջոցի եւ ուժանիւթի ոլորտներուն մէջ համագործակցութեան, ինչպէս նաեւ Լեռնային Ղարաբաղի հիմնախնդիրի կարգաւորման, Հայաստան-Թուրքիա յարաբերութիւններուն, ԵՄ աջակցութեան ծրագիրներուն առնչուող հարցեր:

Կողմերը արձանագրած են, որ անցեալ տարի Սեպտեմբերին Երեւանի մէջ կայացած 12-րդ նիստէն ետք` զգալի եւ էական յառաջընթաց արձանագրուած է երկկողմ համագործակցութեան բոլոր ոլորտներուն մէջ: Յատկապէս ամրագրուած է ՀՀ-ԵՄ ԽՀԱԱԳ գօտիի ստեղծման շուրջ բանակցային արդիւնաւէտ գործընթացը եւ արձանագրուած յառաջընթացը: Նիստին աւարտին կողմերը գոհունակութիւն յայտնած են երկկողմ յարաբերութիւններու զարգացման ընթացքին վերաբերեալ:
22 Ապրիլ 1996-ին Հայաստանի Հանրապետութեան ու Եւրոպական Համայնքներուն եւ անոր անդամ պետութիւններուն միջեւ կնքուած է Գործընկերութեան եւ համագործակցութեան մասին համաձայնագիրը (ԳՀՀ), որ ուժի մէջ մտած է 1 Յուլիս 1999-ին:

Համաձայնագիրի 83-րդ յօդուածին համաձայն` ստեղծուած է Համագործակցութեան կոմիտէ, որուն նիստերը կը գումարուին տարին մէկ անգամ, փոփոխութեան կարգով` Երեւանի եւ Պրիւքսէլի մէջ:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button