ՀՀ ԱԺ Նախագահը Ընդունեց ՀՀ-ի Մէջ Արժանթինի Դեսպանը

 ՀՀ ԱԺ նախագահ Յովիկ Աբրահամեան Հոկտեմբեր 11-ին ընդունեց ՀՀ-ի մօտ Արժանթինի Հանրապետութեան արտակարգ եւ լիազօր դեսպան Տիեկօ Էռնեսթօ Ալվարես Ռիւերան: Այս մասին կը հաղորդէ ՀՀ ԱԺ տեղեկատուական կայքը:

Շնորհաւորելով պարոն Ռիւերան Հայաստանի մէջ Արժանթինի արտակարգ եւ լիազօր դեսպանի պաշտօնը ստանձնելուն առիթով` Յովիկ Աբրահամեան յաջողութիւններ մաղթեց անոր պատասխանատու գործին եւ պատրաստակամութիւն յայտենց իբրեւ ԱԺ նախագահ աջակցելու հայ-արժանթինական համագործակցութեան զարգացման ուղղուած իւրաքանչիւր նախաձեռնութեան: ԱԺ նախագահը նշեց, որ Հայաստան հետաքրքրուած է Լատինական Ամերիկայի երկիրներու, մասնաւորապէս` Արժանթինի հետ բարեկամական յարաբերութիւններու զարգացմամբ եւ խորացմամբ: Ան կարեւոր համարեց փոխադարձ հետաքրքրութիւն ներկայացնող ոլորտներուն մէջ յարաբերութիւններու զարգացումը, միջխորհրդարանական համագործակցութեան աշխոյժացումը, երկկողմ բարձրաստիճան այցելութիւնները, տարբեր մակարդակներով շփումներու շարունակականութիւնը: Յովիկ Աբրահամեան գոհունակութեամբ փաստեց, որ երկու երկիրներու խորհրդարաններուն մէջ ձեւաւորուած են բարեկամութեան խումբեր, որոնք, արդիւնաւէտ աշխատանքի շնորհիւ, կրնան խթանել երկկողմ յարաբերութիւնները: Կարեւոր համարուեցաւ միջազգային կազմակերպութիւններու մէջ երկու երկիրներուն յետագայ արդիւնաւէտ համագործակցութիւնը:

Շնորհակալութիւն յայտնելով ընդունելութեան համար` Արժանթինի դեսպանը նոյնպէս կարեւոր համարեց երկկողմ յարաբերութիւններու զարգացումը քաղաքական, առեւտրատնտեսական, մշակութային եւ այլ ոլորտներու մէջ` նշելով, որ առկայ է չօգտագործուած մեծ ներուժ: Հայ-արժանթինեան փոխգործակցութեան խորացման առումով` դեսպանը կարեւոր համարեց միջխորհրդարանական կապերու զարգացման եւ աշխոյժացման անհրաժեշտութիւնը:

Հանդիպման ընթացքին քննարկուեցան երկկողմ հետաքրքրութիւն ներկայացնող այլ հարցեր եւս:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button