Մոսկուա Եւ Դամասկոս Կը Դատապարտեն Սուրիական Օդանաւ Մը Զննելու Անգարայի Քայլը

 Ռուսիոյ եւ Սուրիոյ իշխանութիւնները դատապարտեցին սուրիական ճամբորդական օդանաւ մը Անգարայի մէջ վայրէջք կատարել պարտադրելու Թուրքիոյ քայլը, մինչ Թուրքիա յայտարարեց, թէ օդանաւին մէջ կային ռազմական հաղորդակցութեան սարքաւորումներ:
Մոսկուայէն ճամբայ ելած օդանաւը Անգարայի մէջ մանրակրկիտ քննութեան ենթարկուեցաւ ու Հինգշաբթի օրուան կանուխ ժամերուն միայն անոր արտօնուեցաւ, որ շարունակէ իր ճամբան դէպի Դամասկոս:
«Սուրիական» օդանաւային ընկերութեան պատկանող օդանաւին մէջ կային մօտաւորապէս 30 ճամբորդներ, նարառեալ՝ Ռուսիոյ քաղաքացիներ:
Թուրքիոյ արտաքին գործոց նախարար Ահմէտ Տաւուտօղլու ըսաւ, որ օդանաւէն որոշ ապրանքներ առնուած են՝ յաւելեալ քննութեանց համար, սակայն չմանրամասնեց այդ մասին:
Սուրիական իշխանութիւնները կը պնդեն, թէ օդանաւին մէջ որեւէ զինանիւթ չկար՝ դատապարտելով ճամբորդներու նկատմամբ Թուրքիոյ ցուցաբերած «անմարդկային վերաբերմունքը»։ Ըստ թրքական «Ռատիքալ» թերթին, թուրք զինուորներ բռնութիւն կիրառած են կարգ մը ճամբորդներու դէմ, որոնք մերժած են որոշ փաստաթուղթեր ստորագրել:
Միւս կողմէ՝ դիւանագիտական աղբիւրներ լիբանանեան «Ժումհուրիա» օրաթերթին յայտնած են, որ Միացեալ Նահանգներ Թուրքիոյ փոխանցած է, թէ Սուրիոյ հետ զինուորական ճակատումներու ծիրը պէտք չէ ընդլայնել, որովհետեւ եթէ այդ մէկը տեղի ունենայ, ապա ՆԱԹՕ-ն՝ իր ուխտի 5րդ յօդուածին հիմամբ՝ ինքնաբերաբար այդ ճակատումին մէջ կը ներքաշուի:
ՆԱԹՕ-ի ընդհանուր քարտուղար Անտերս Ֆոկ Ռասմուսեն յայտնած էր, որ ՆԱԹՕ-ն, անհրաժեշտութեան պարագային, Թուրքիան պաշտպանելու միջոցառումներ որդեգրած է՝ նշելով սակայն, որ արբանեակներու ճամբով ամերիկացիներուն ի յայտ եկած է, թէ «թրքական հողամասերուն վրայ ինկած հրթիռներէն ոչ բոլորը սուրիական կանոնաւոր բանակին կողմէ արձակուած են, ինչ որ կը նշանակէ, թէ այլ կողմ մը կը փորձէ սուրիական վարչակարգն ու թրքական կառավարութիւնը ճակատումի մղել»:
Մինչ այդ, ամերիկեան «Նիւ Եորք Թայմզ» թերթը, ամերիկացի լաւատեղեակ պաշտօնատարներ վկայակոչելով՝ հաղորդեց, որ ամերիկեան բանակը, բարձրաստիճան սպայի մը գլխաւորութեամբ, 150 ամերիկացի զինուորներէ բաղկացած զինուորական ուժ մը գաղտնաբար Յորդանան ուղարկած է, 200 հազարի հասնող սուրիացի գաղթականներու հարցով յորդանանեան բանակին օժանդակելու, ինչպէս նաեւ առ ի պատրաստութիւն քիմիական զէնքերու վրայ Դամասկոսի վերահսկողութեան կորուստի եւ սուրիական տագնապի ընդարձակման հաւանականութեան: Օրաթերթը նաեւ կը նշէ, որ այդ զինուորներուն պարտականութիւնն է նաեւ Յորդանանը պաշտպանել Սուրիոյ իրադարձութիւններէն եւ թուրք-սուրիական սահմանին վրայ տեղի ունեցող դէպքերուն նման բախումներու առաջքը առնել:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button