Վախճանած է Երուսաղէմի Հայոց Պատրիարքը

Ն.Ս.Օ.Տ.Տ Գարեգին Բ Ամենայն Հայոց Կաթողիկոսը այսօր տեղեկացած է Երուսաղէմի պատրիարքական փոխանորդ Տ. Նուրհան արքեպիսկոպոս Մանուկեանէն, որ Երուսաղէմի մէջ երկարատեւ հիւանդութենէ ետք` կեանքի 93-րդ տարին ի Տէր ննջեց Երուսաղէմի Հայոց Պատրիարք Ամենապատիւ Տ. Թորգոմ արքեպիսկոպոս Մանուկեանը:

“Ամենայն Հայոց Կաթողիկոսը, Գերագոյն հոգեւոր խորհուրդը եւ Հայ Եկեղեցւոյ ողջ եկեղեցական դասը կը սգան բազմավաստակ Պատրիարք Սրբազան Հօր մահը` աղօթելով, որ Տէրը Սուրբ Հոգիի մխիթարութիւնը պարգեւէ հաւատաւոր մեր ժողովուրդին եւ Իր խնամքի եւ օրհնութեան ներքոյ պահէ Երուսաղէմի Հայոց Պատրիարքական Աթոռը եւ անոր զինուորեալ միաբանութիւնը:

Ամենապատիւ Տ. ծնած է 1919-ին, Պաղտատի հիւսիսը (Իրաք): Պաղտատի Սրբոց Թարգմանչաց հայկական դպրոցին մէջ նախակրթական ուսումը աւարտելէ ետք ընդունուած է Երուսաղէմի Հայոց Պատրիարքարանի Սրբոց Յակոբեանց ժառանգաւորաց վարժարան:

1936-ին սարկաւագ ձեռնադրուած է ձեռամբ երջանկայիշատակ Պատրիարք Թորգոմ արքեպիսկոպոս Գուշակեանի:
1939 Յուլիս 23-ին ձեռնադրուած է կուսակրօն քահանայ` ստանալով Թորգոմ անունը:

1939-46-ին Երուսաղէմի Հայոց Պատրիարքարանին մէջ վարած է տարբեր պաշտօններ. աշխատած է Պատրիարքարանի “Սիոն” ամսագիրի խմբագրութեան մէջ, ինչպէս նաեւ եղած է ճեմարանի փոխտեսուչ:

1946 Յուլիսին մեկնած է ԱՄՆ եւ նշանակուած Հիւսիսային Ֆիլատելֆիայի (Փենսիլվանիա) Ս. Երրորդութիւն հայկական եկեղեցւոյ հոգեւոր հովիւ: 1951 Ամերիկայի Արեւելեան թեմի առաջնորդի կողմէ նշանակուած է թեմի առաջնորդական փոխանորդ:

1954-ին Հիւսիսային Ֆիլատելֆիայի մէջ մէկ տարիով վերսկսելով ծառայութիւնը` Հայր Թորգոմը վերադարձած է Երուսաղէմ եւ նշանակուած ճեմարանի տեսուչ: Ան նաեւ վարած է Պատրիարքարանի դիւանապետի պարտականութիւնները:

1960-ին վերադառնալով ԱՄՆ` ուսումը շարունակելու նպատակով ընդունուած է Քեմպրիճի Եպիսկոպոսական Աստուածաբանական Դպրոց (Մասաչուսէթս):

1962-ին ընտրուած է Հայ Եկեղեցւոյ Ամերիկայի Արեւմտեան թեմի առաջնորդ:

Նոյն թուականի Հոկտեմբեր 14-ին, ձեռամբ երջանկայիշատակ Ամենայն Հայոց Վազգէն Ա Կաթողիկոսի, Մայր Աթոռ Ս. Էջմիածինի մէջ ձեռնադրուած է եպիսկոպոս:

1966 Ապրիլին, Արեւմտեան թեմի առաջնորդի պաշտօնին չորս տարի ծառայելէ ետք Թորգոմ Եպիսկոպոսը ընտրուած է Հայ Եկեղեցւոյ Ամերիկայի Արեւելեան թեմի առաջնորդ:

Երկու տարի անց երջանկայիշատակ Վազգէն Ա Կաթողիկոսի կողմէ անոր շնորհուած է Արքութեան պատիւ:

Արեւելեան թեմի առաջնորդի պաշտօնին 24 տարի ծառայելէ ետք Թորգոմ Արքեպիսկոպոսը 1990 Մարտ 22-ին ընտրուած է Երուսաղէմի 96-րդ Պատրիարք:

1994 Օգոստոս 19-ին Վազգէն Ա Կաթողիկոսի մահէն ետք Ամենապատիւ Սրբազան Հայրը նշանակուած է Կաթողիկոսական Տեղապահ:

Թորգոմ Արքեպիսկոպոս Մանուկեան ստացած է շարք մը ակադեմիական պարգեւներ, արժանացած է Նիւ Եորքի Ընդհանուր Աստուածաբանական Ճեմարանի պատուաւոր դոկտորի կոչման:

1986-ին ստացած է նաեւ Ամերիկայի երկու գլխաւոր պարգեւները. “Ազատութեան Արձան” եւ “էլիզ Այլընտ” պատուոյ շքանշանները:

Թորգոմ Պատրիարքը մեծ աւանդ ունեցած է միջազգային էկումենիկ յարաբերութիւններու զարգացման գործին: Ան ծառայած է ԱՄՆ-ի մէջ Քրիստոսի Եկեղեցիներու Ազգային Ժողովի յանձնաժողովին մէջ, նախագահած է “կրօնն ամերիկեան կեանքին մէջ” խորհուրդը: Եղած է նաեւ “խղճմտանքի կոչ” հիմնադրամի տնօրէններու խորհուրդի անդամ:

Թորգոմ Պատրիարքը հեղինակ է 20 մենագրութիւններու, որոնց մէջ` բանաստեղծական երեք ժողովածու, հայկական Ս. Պատարագի ուսումնասիրութիւն, հայոց Մեծ Եղեռնին նուիրուած գիրքեր եւ Երուսաղէմի սուրբ վայրերու մանրամասն ուղեցոյց: Պատրիարք Հայրը ճանչցուած կոմիտասագէտ էր:

Հոկտեմբեր 14-ին` Ս. Պատարագի աւարտին, Մայր Տաճարի մէջ պիտի կատարուի հոգեհանգստեան արարողութիւն` Հայ Եկեղեցւոյ վաստակեալ սպասաւորի հոգւոյ խաղաղութեան համար:

Յիշատակը արդարոյն օրհնութեամբ եղիցի»,- ըսուած է Մայր աթոռի տեղեկատուական համակարգի տարածած մահազդին մէջ:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button
 

STAINLESS STEEL

 

–>