Փութինի Թուրքիա Այցելութիւնը «Անորոշ Թուականով» Յետաձգուած Է

Թրքական կործանիչ մը Չորեքշաբթի գիշեր Մոսկուա-Դամասկոս թռիչք կատարող սուրիական օդանաւային ընկերութեան օդանաւը ստիպած էր քննութեան համար էջք կատարել Անգարայի օդակայան: Ռուսիոյ արտաքին գործոց նախարարութեան բանբեր Ալեքսանտր Լուքաշեւիչ հաղորդագրութիւն մը հրապարակելով յայտնեց, որ Թուրքիա վտանգած է նշեալ օդանաւին մէջ գտնուող ճամբորդներուն, ներառեալ` Ռուսիոյ 17 քաղաքացիներու կեանքը:

Ան ըսած է, որ թրքական կողմը Անգարայի մէջ Ռուսիոյ դեսպանատան չէ տեղեկացուցած, որ ուղեւորներու շարքին Ռուսիոյ քաղաքացիներ կան: Ռուսիոյ արտաքին գործոց նախարարը այդ մասին տեղեկացած է ելեկտրոնային լրատուամիջոցներէն:

«Անգարա խախտած է երկկողմանի համաձայնութիւնը եւ ռուս դիւանագէտներուն չէ արտօնած հանդիպիլ օդանաւին մէջ գտնուող Ռուսիոյ քաղաքացիներուն հետ: Մոսկուա այդ արարքին վերաբերեալ թրքական իշխանութիւններէն բացատրութիւն կը պահանջէ եւ անընդունելի կը նկատէ նման միջադէպերու կրկնութիւնը», ըսած է Ռուսիոյ արտաքին գործոց նախարարութեան բանբերը:

Լուքաշեւիչ յայտնած է, որ Անգարայի մէջ Ռուսիոյ դեսպանատունը պահանջած է Ռուսիոյ քաղաքացիներուն հետ հանդիպիլ: Օդակայան ուղարկուած են դեսպանատան աշխատողներ եւ բժիշկ մը, սակայն թրքական կողմը, առանց պատճառաբանութեան, արգիլած է դիւանագէտներու ռուս քաղաքացիներուն հետ հանդիպումը: Ռուսիոյ քաղաքացիներուն ճաշ չեն տրամադրած եւ թոյլ չեն տուած օդակայանի տարածք դուրս գալ:

«Ռուսական կողմը նման գործողութիւններու համար բացատրութիւն կը պահանջէ թրքական իշխանութիւններէն, ինչպէս նաեւ այսպիսի միջադէպերու ապագային կրկնութիւնը կանխարգիլելու համար միջոցառումներու որդեգրումը կը պահանջէ», յայտարարած է ան:

Միւս կողմէ Քրեմլին յայտարարեց, որ Ռուսիոյ նախագահ Վլատիմիր Փութինի Թուրքիա այցելութիւնը յետաձգուած է` նշելով, որ «նախագահ Փութին որոշեց Թուրքիա իր այցելութիւնը անորոշ թուականով յետաձգել»:

Ռուսիոյ նախագահական բանբեր Տմիթրի Փեսքով, որ լուրը փոխանցեց, այցելութեան յետաձգման պատճառը չնշեց: Ան բաւարարուեցաւ նշելով, որ «այցելութիւնը ջնջուեցաւ եւ անոր թուականին շուրջ համաձայնութիւն պիտի գոյանայ»` աւելցնելով, որ «այցելութիւնը տեղի պիտի ունենայ»:

Ըստ ռուսական եւ թրքական լրատուամիջոցներու, այցելութիւնը նախատեսուած էր Հոկտեմբեր 15-ին:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button