Անհրաժեշտ է Ստեղծել 350 Պատգամաւորէ Բաղկացած Սփիւռքի Խորհրդարան. Յարութ Սասունեան

 «Ցեղասպանութեան ճանաչո՞ւմ, թէ արդարութեան հետապնդում» թեմայով բացառիկ դասախօսութեամբ Հայկական պետական մանկավարժական համալսարանին մէջ Հոկտեմբեր 12-ին հանդէս եկած է հանրածանօթ հասարակական գործիչ, հրապարակախօս, բարերար, Լոս Անճելըսի «Քալիֆորնիա Քուրիեր» շաբաթաթերթի հրատարակիչ եւ խմբագիր Յարութ Սասունեան: Այս մասին կը տեղեկացնէ Armenpress.am-ը:

Դասախօսութեան ընթացքին Սասունեան խօսած է Հայոց Ցեղասպանութեան, անոր ճանաչման, կորսնցուցած տարածքներու եւ վնասներու հատուցման մասին: Բանախօսը անդրադարձած է նաեւ ցեղասպանութենէն ետք աշխարհի մէջ սփռուած հայերու ճակատագրին, նշելով, որ ցեղասպանութիւն վերապրողներու յետագայ սերունդներուն` իրենց հայրենիք վերադառնալու երազանքը այդպէս ալ չէ իրականացած եւ անոնք մշտապէս մնացած են աքսորի ճանապարհին:

«Հայոց Ցեղասպանութեան ճանաչումը եւ նոյնիսկ անտեսումը պէտք չէ  դիւրացնէ կամ խափանէ անոր քննարկումը միջազգային դատարաններու կողմէ: Մենք մեր պատմական իրաւունքները պէտք է հետապնդենք իրաւական ուղիներով` եւրոպական, միջազգային դատարաններու միջոցով»,- ընդգծած է ան:

Դասախօսութեան աւարտէն ետք ուսանողներն ու դասախօսները Յարութ Սասունեանին ուղղած են շարք մը հարցեր:

Անդրադառնալով հայ-թրքական արձանագրութիւններուն, ան նկատած է,- «Իմ կարծիքով` անոնք վնասակար են հայ ժողովուրդի շահերուն եւ մեր պահանջատիրութեան: Ամէն ինչ ըրած եմ, որ այդ արձանագրութիւնները չվաւերացուին, եւ այսօր կրնամ ըսել` բախտաւոր ենք, որ Թուրքիան չվաւերացուց զայն եւ վերջինիս շնորհիւ պաշտպանուեցան մեր շահերը»:

Իսկ հարցին, թէ արդեօ՞ք հակադրուելով այդ արձանագրութիւններուն` չենք վտանգեր ՀՀ ազգային անվտանգութիւնը` բանախօսը նշած է,- «Հակառակը, դէմ ըլլալով այդ արձանագրութիւններուն` մենք կը պաշտպանենք Հայաստանի  անվտանգութիւնը: Համաձայն եմ, որ Թուրքիոյ հետ ստեղծուին որոշ յարաբերութիւններ, սակայն դէմ եմ տուեալ արձանագրութիւններուն մէջ առկայ ձեւակերպումներուն: Կը կարծեմ, որ մեզ օգտակար արձանագրութեամբ պէտք է Հայաստանի եւ Թուրքիոյ միջեւ հաստատուին   դիւանագիտական յարաբերութիւններ, որուն իբրեւ արդիւնք ալ պիտի բացուին սահմանները»:

Ցեղասպանութեան ճանաչման  խնդիրով արդեօ՞ք Հայաստանը եւ Սփիւռքը արդիւնաւէտ կ’աշխատին` հարցին ի պատասխան Սասունեան ըսած է,- «Տակաւին բացթողումներ կան, եւ անհրաժեշտ է աւելի սերտ համագործակցութիւն, որուն իբրեւ արդիւնք միայն կարելի է սկսիլ որեւէ դատական գործընթաց»: Ի դէպ, Յարութիւն Սասունեան առաջարկած է ստեղծել 350 պատգամաւորէ բաղկացած Սփիւռքի խորհրդարան եւ համակարգել Սփիւռքի գործունէութիւնը:

Իբրեւ սուրիահայ` Յարութ Սասունեան գնահատած է նաեւ թուրք-սուրիական յարաբերութիւններուն ներկայ վիճակը: Ան իրատեսական չի համարեր Թուրքիոյ յարձակումը Սուրիոյ վրայ, եւ զայն կը դիտարկէ իբրեւ «վախցնող քայլ»: Ըստ բանախօսին` Թուրքիան չի ծրագրեր պատերազմիլ, քանի որ կը գիտակցի  հետեւանքներու լրջութիւնը. «Թուրքիան կ’ուզէ առանց պատերազմի` վախցնելով եւ ճնշելով,  հասնիլ իր նպատակին»:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button
 

STAINLESS STEEL

 

–>