Իտալիոյ Խորհրդարանը Ապրիլ 24-ը Իբրեւ Հայոց Ցեղասպանութեան Զոհերու Յիշատակի Օր Պետականօրէն Ճանչնալու Օրինագիծը Պիտի Քննարկէ

ՀՀ ԱԺ նախագահ Յովիկ Աբրահամեան Հոկտեմբեր 12-ին ընդունած է Իտալիոյ Հանրապետութեան Ծերակոյտի եւ Պատգամաւորներու պալատի Իտալիա-Հայաստան պատգամաւորական բարեկամութեան խումբի անդամները, որոնք կը ներկայացնեն խորհրդարանին մէջ գործող հիմնական խմբակցութիւնները: Այս մասին կը հաղորդէ ՀՀ ԱԺ մամուլի եւ տեղեկատւութեան միջոցներու հետ կապերու վարչութիւնը:

Ողջունելով հիւրերը` ԱԺ նախագահը կարեւոր համարած է Իտալիոյ խորհրդարանական պատուիրակութեան այցը Հայաստան եւ նշած, որ անիկա առաջինն է բարեկամութեան խումբերու մակարդակով եւ, վստահաբար, նոր էջ պիտի բանայ ինչպէս առհասարակ հայ-իտալական, այնպէս ալ միջխորհրդարանական յարաբերութիւններուն մէջ:

Անդրադառնալով հայ-իտալական համագործակցութեան` Յովիկ Աբրահամեան նշած է, որ երկկողմ յարաբերութիւնները ունին զարգացման լաւ հեռանկարներ քաղաքական, տնտեսական, մշակութային եւ այլ բնագաւառներու մէջ: Անոր համոզմամբ` հայ-իտալական միջխորհրդարանական կապերը աւելի արդիւնաւէտ զարգացնելու առումով անհրաժեշտ է օգտագործել համագործակցութեան հնարաւոր բոլոր ձեւաչափերը, ներառեալ փոխգործակցութիւնը միջազգային խորհրդարանական կառոյցներու մէջ: Իտալիա-Հայաստան պատգամաւորական բարեկամութեան խումբի ղեկավար Սանտրա Ձամբա շնորհակալութիւն յայտնած է Հայաստան այցելելու հրաւէրին համար եւ կարեւոր համարած է  նման հանդիպումները միջպետական եւ  միջխորհրդարանական կապերը զարգացնելու առումով:

Տիկին Ձամբան բարձր գնահատած է հայ ժողովուրդին ներդրումը եւրոպական եւ մասնաւորապէս իտալական մշակոյթի, գիտութեան, տնտեսութեան եւ այլ ոլորտներու մէջ: Անոր խօսքով` հայերը դարեր շարունակ մեծ հետք ձգած են եւրոպական մշակոյթի եւ տնտեսութեան մէջ: «Այժմ Եւրոպան պէտք է  վերադարձնէ ձեզ այն, ինչ դուք երկար տարիներ ներդրած էք Եւրոպայի մէջ եւ պիտի զօրաւիգ ըլլայ ձեր պետութեան կայացման»,- նշած է իտալացի պատգամաւորը: Սանտրա Ձամբան տեղեկացուցած է, որ Իտալիոյ խորհրդարանին մէջ շրջանառութեան մէջ դրուած է օրինագիծ, որմով Ապրիլ 24-ը Իտալիոյ մէջ պետականօրէն պիտի համարուի Հայոց Ցեղասպանութեան զոհերու յիշատակի օր:

Հանդիպման ընթացքին անդրադարձ եղած է տարածաշրջանային խնդիրներուն, հայ-թրքական յարաբերութիւններուն, ԼՂ հիմնախնդիրի կարգաւորման: ԱԳԺ նախագահը նշած է, որ Ատրպէյճանի մէջ պետական մակարդակով արմատաւորուած հայատեացութեան մթնոլորտը պէտք է բաւարար հիմք հանդիսանայ միջազգային հանրութեան համար հասկնալու, որ ոչ մէկ պարագայի եւ ոչ մէկ ձեւաչափով Արցախը կրնայ մաս կազմել երկրի մը, որ կը հերոսացնէ սաֆարովներու կերպարը եւ իր այս քայլով  ատրպէյճանը անգամ մը եւս կը վտանգէ տարածաշրջանային փխրուն անվտանգութիւնը, կ’ոտնահարէ միջազգային իրաւական փաստաթուղթերով երաշխաւորուած մարդու իրաւունքները, կրկին ի ցոյց կը դնէ Լեռնային Ղարաբաղի հիմնախնդիրի խաղաղ կարգաւորման բանակցային գործընթացը փակուղի տանելու եւ անոր մէջ միջազգային հանրութեան, մասնաւորապէս` ԵԱՀԿ Մինսկի խումբի համանախագահներու կատարած աշխատանքը ձախողցնելու իր հետեւողական քաղաքականութիւնը:

«Պաքուն հայատեացութիւնը դարձրել է պետական քարոզչութիւն` հասցնելով այն առաւել քան վտանգաւոր մակարդակի: Սա միայն մեր գնահատականը չէ. այս մասին ահազանգում են նաեւ միջազգային կառոյցները: Մենք հաւատարիմ ենք մնում Լեռնային Ղարաբաղի հիմնախնդրի խաղաղ կարգաւորման` ԵԱՀԿ Մինսկի խմբի եռանախագահների միջնորդութեամբ ընթացող գործընթացին»,- շեշտած է Յովիկ Աբրահամեան:

ԱԺ նախագահը շնորհակալութիւն յայտնած է իտալացի պատգամաւորներուն, որ մերժած են Իտալիոյ խորհրդարանին մէջ շրջանառութեան մէջ դրուած Լեռնային Ղարաբաղի վերաբերեալ Ատրպէյճանի տեսակէտները արտայայտող եւ խիստ միակողմանի բնոյթ կրող բանաձեւը, որուն ի պատասխան տիկին Ձամբա նշած է, որ ատրպէյճանամէտ բանաձեւը մերժուած է, քանի որ անիկա չէր արտայայտեր Իտալիոյ տեսակէտը հիմնախնդիրին կարգաւորման վերաբերեալ եւ չէր համապատասխաներ Իտալիոյ դիրքորոշման միջազգային ատեաններու մէջ:

Հանդիպման ընթացքին քննարկուած են այլ հարցեր եւս:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button