Անթիլիասի Դպրեվանքը Կազմաւորման Հնոց է. Արամ Ա.

Մեծի Տանն Կիլիկիոյ Կաթողիկոսութեան Դպրեվանքի 83-րդ ուսումնական տարեշրջանի բացումը տեղի ունեցաւ հովանաւորութեամբ՝ Ն.Ս.Օ.Տ.Տ. Արամ Ա. Կաթողիկոսի Կիրակի, 14 Հոկտեմբեր 2012-ին, Անթիլիասի Ս. Գրիգոր Լուսաւորիչ Մայր Տաճարին մէջ մատուցուած սուրբ եւ անմահ պատարագով, որուն ընթացքին սաներ սուրբ հաղորդութիւն ստացան։

Պատարագեց Փոխ-տեսուչ Հոգշ. Տ. Յուսիկ Վրդ. Մարտիրոսեան եւ քարոզեց Տեսուչ Գերշ. Տ. Նարեկ Արք. Ալեէմէզեան, որ ՙԹարգմանիչ վարդապետներ կենդանի գիրը երկրի վրայ հաստատեցին, հովուելու համար նոր Իսրայէլի հօտը. արդ, քացրահունչ երգով զԱստուած օրհնենք՚ (Սրբոց Թարգմանչաց Օրհնութեան Շարական, առաջին տուն) բնաբանին լոյսին տակ ընդծեց, թէ Դպրեվանքը Անթիլիասէն հայ մշակոյթի ոսկեդարը կերտած Սահակ-Մեսրոպեան սերունդին առաքելութիւնը կը շարունակէ 1930-էն ի վեր՝ Աստուծոյ կենդանացուցիչ ներգործութիւնն ու հայ արժէքներու բեղմնաւորումը ծաւալելով հայ ժողովուրդի աշխարհասփիւռ զաւակներուն մէջ:

Սուրբ եւ անմահ պատարագը երգեցին դպրեվանեցիներ, ղեկավարութեամբ Մայր Տաճարի Դպրապետ Հոգշ. Տ. Թորգոմ Վրդ. Տօնոյեանի։

Ապա, անոնք թափօր կազմած եւ Ս. Թարգմանիչներու նուիրուած շարականներու երգեցողութեամբ վեհարանի դահլիճը բարձրացան, ուր Վեհափառ Հայրապետի հանդիսապետութեամբ եւ միաբան հայրերու, ուսուցիչներու, ուսանողներու, ծնողներու ու Անթիլիասի Դպրեվանքին սատար հանդիսացող հայորդիներու ներկայութեան, գործադրուեցաւ բացման հանդէսը։

Յայտագիրը կը ներառէր Դպրեվանքի ՙՍիրտ ի սիրտ՚ քայլերգը, շարականներ, Աւետարանէն եւ Նարեկ Աղօթամատեանէն ընթերցումներ, արտասանութիւն մը եւ ՙԿիլիկիա՚ ու ՙԻ վեհ բարձանց՚ մաղթերգերը։

Տեսչական խօսքը ուղղեց Գերշ. Տ. Նարեկ Արք. Ալեէմէզեան եւ փառք տուաւ Աստուծոյ որ դարձեալ կը գտնուինք նոր տարեշրջանի մը սեմին, որ պարտաւոր ենք հոգեւոր եւ իմացական աճումով լեցնել։

Ան որդիաբար շնորհակալութիւն յայտնեց Արամ Ա. Սրբազնագոյն Հայրապետին, որ իր հովուապետական բազում մտահոգութիւններուն մէջ առաջնահերթութիւն կու տայ Դպրեվանքին եւ այս տարեշրջանին եւս կը գլխաւորէ ուսուցչական կազմը£ Ան իր խօսքը եզրափակեց, սաներուն յանձնարարելով այս տարեշրջանին Անթիլիասի Դպրեվանքի հաւաքական կեանքի ուղեցոյց որդեգել “Քրիստոսակեդրոն կեանքը. ՙԵթէ մէկը ուզէ ինծի հետեւիլª թող ուրանայ իր անձը, առնէ իր խաչը եւ ետեւէս գայ՚ (Մարկոս 8.34)”։

Սրբազանը ներկայացուց Դպրեվանքի տեսչական, ուսուցչական եւ ուսանողական պատկերը, յայտնելով թէ նորանշանակ տեսչութեան մաս կը կազմեն Փոխ-տեսուչ Հոգշ. Տ. Յուսիկ Վրդ. Մարտիրոսեան եւ Հսկիչներ Հոգշ. Տ. Պօղոս Աբղ. Թինքճեան, Հոգշ. Տ. Գարեգին Աբղ. Շխրտըմեան եւ Հոգշ. Տ. Զարեհ Աբղ. Սարգիսեան, ուսուցիչներուն ընդհանուր թիւն է քսանութը£ Ուսուցչական կազմը միշտ կը գլխաւորէ Վեհափառ Հայրապետը սիստեմաթիք աստուածաբանութիւն եւ հովուական աստուածաբանութիւն դասաւանդելով բարձրագոյն կարգին:

Ապա Վեհափառ Հայրապետը փոխանցեց իր պատգամը ըսելով թէ ՙԱնթիլիասի Դպրեվանքը հոգեմտաւոր կազմաւորման հնոց է: Այսպէ՛ս եղած է Անթիլիասի Դպրեվանքը իր ծնունդով ու իր կոչումով: Ան մարդ պատրաստելու առաքելութեան է լծուած. ո՛չ սովորական մարդ, ո՛չ նաեւ սովորական ծանօթութիւններով զինուած մարդ, այլ՝ մեր ազգի, եկեղեցւոյ ու մշակոյթի նուիրական արժէքներով կազմաւորուած ու մեր գերագոյն իղձերու ու իտէալներու կրակով ու տագնապով թրծուած մարդ:

Անթիլիասի Դպրեվանքը հաւատք ու նուիրում, պատասխանատուութեան ոգի, ու յանձնառութեան կամք ունեցող մարդ կը պատրաստէ: Եւ այս տիպի մարդերն են որոնք մեր եկեղեցին աւելի՛ պիտի պայծառացնեն, անոր առաքելութիւնը աւելիո՛վ պիտի կենսագործեն, մեր մշակոյթը աւելի՛ պիտի ծաղկեցնեն, մեր հայրենիքը աւելի՛ պիտի հզօրացնեն, մեր ժողովուրդի արդար իրաւունքները աւելի՛ մարտունակութեամբ պիտի հետապնդեն:՚ Ապա Վեհափառ Հայրապետը աւելցուց. ՙԱյսօր երբ մեր ազգի կեանքի բոլոր մարզերէն ներս նահանջը զգալի է, մենք որքան հրամայական ու անմիջական կարիքը ունինք նման մարդոց՚: Վեհափառը ողջունելով Անթիլիասի Դպրեվանքի Տեսուչ Սրբազանը, տեսչութիւնն ու ուսուցչական կազմը, կոչ ուղղեց անոնց այս ոգիով լծուելու մարդու պատրաստութեան նուիրական աշխատանքին: Ան նաեւ իր հայրական պատգամը ուղղեց աշակերտութեան, շեշտելով ամբողջական նուիրումով ու աշխատանքով մասնակից դառնալու Դպրեվանքի հոգեմտաւոր կեանքին:

Իր խօսքի աւարտին Վեհափառ Հայրապետը իր գնահատանքը յայտնեց Անթիլիասի Դպրեվանքին նեցուկ կանգնող բարերարներուն ու ազգայիններուն, ըսելով որ ՙի՛նչ որ կուտաք ու կ’ընէք Անթիլիասի Դպրեվանքին համար, վստահ եղէք, որ անոնք մարդու պատրաստութեան սրբազան առաքելութիւնը աւելի՛ կÿարդիւնաւորեն՚:

Հանդիսութիւնը աւարտեցաւ Վեհափառ Հայրապետի ՙՊահպանիչ՚-ով։

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button