Օտարերկրեայ Ներդրողները Հայաստանի Մէջ Հեռանկար Չեն Տեսներ. Վարդան Օսկանեան

 Վարդան Օսկանեան այսօր Ֆեյսպուք հասարակական ցանցի իր էջին մէջ գրառում կատարած է այն մասին, թէ ինչո՞ւ Հայաստանի մէջ նուազած է օտարերկրեայ ներդրումներուն քանակը. «Հայաստանի մաքրոտնտեսական մտահոգիչ ցուցանիշներէն մէկը օտարերկրեայ ներդրումներու կտրուկ անկումն է: Ատիկա մտահոգիչ է, որովհետեւ բոլորին համար ալ պարզ է, որ առանց արտաքին լուրջ ներդրումներու հնարաւոր չէ կայուն տնտեսական զարգացում ապահովել: 2012-ի առաջին կիսուն նախորդ տարուան նոյն ժամանակահատուածի համեմատ օտարերկրեայ ուղղակի ներդրումները նուազած են 40 տոկոսով, իսկ երկրորդ եռամսեակին այդ անկումը կազմած է 60 տոկոս: Ոեւէ ներդրող` օտար, թէ տեղացի, որոշում կայացնելու ընթացքին բնականաբար կը դիտարկէ երկրի մաքրոտնտեսական ցուցանիշները` տնտեսական աճ, գնաճ, արտաքին առեւտուրի հաշուեկշիռ, պետական պարտք եւ այլն: Անխուսափելիօրէն հաշուի կ’առնուին նաեւ ազատ շուկայական յարաբերութիւններու հիմնարար սկզբունքներու կիրառումն ու յարգումը` ազատ մրցակցութիւն, հաւասար պայմաններ եւ սեփականութեան անձեռնմխելիութիւն:

«Բայց կան նաեւ զուտ տնտեսագիտութենէն դուրս գործօններ, որոնք էապէս կ’ազդեն ներդրողներու որոշումներուն վրայ: Վերջերս Սուրիայէն ժամանած յաջողակ, լուրջ նիւթական միջոցներ եւ արտադրութեան ոլորտին մէջ գիտելիք ունեցող մարդոց հետ կը զրուցէի: Հակառակ անոնց հնարաւորութիւններուն եւ Հայաստանի մէջ ներդրում ընելու ցանկութեան, անոնք շատ լուրջ մտահոգութիւններ եւ վերապահումներ ունին, որոնք կարելի է ամփոփել հետեւեալ չորս կէտերու մէջ.

1. Յոյս եւ հեռանկար երկրի ապագային նկատմամբ. երկրի ապագային նկատմամբ յոյսն ու վստահութիւնը ոչ միայն անհրաժեշտ են ներդրումներու, այլեւ` Հայաստանէն արտագաղթը կասեցնելու համար: Այս յոյսի ներշնչումը պէտք է գայ առաջին հերթին իշխանութեան գլուխ կանգնածներէն, անոնց խօսքով եւ գործով: Պէտք է գայ նաեւ քաղաքական համակարգէն, որ պէտք է ունենայ հակակշիռներու անհրաժեշտ մեքանիզմը եւ երկրի զարգացման եւ հեռանկարներու եւ այլընտրանքներու շուրջ անկաշկանդ ու առողջ բանավէճը: Աեիկա այսօր ի սպառ կը բացակայի:
2. Անորոշութիւններ. որոշակիութիւնը եւ տնտեսութենէն ներդրողի ու սպառողի ակնկալիքները տնտեսութեան խթանման ամենակարեւոր գործօնն են: Այդ առումով ե՛ւ օրէնսդրական դաշտը, ե՛ւ ակնկալիքները խիստ մշուշոտ են: Միայն հարկային եւ մաքսային օրէնսդրութիւնը վերջին քանի մը տարիներու ընթացքին անընդհատ կը փոխուի, եւ խօսակցութիւնները յետագայ փոփոխութիւններու մասին երբեք չեն դադրիր: Ներդրումներուն լրջօրէն կը խանգարէ նաեւ դրամի փոխարժէքի անորոշ վարքագիծը:

3. Արդարութիւն. ոեւէ ներդրող այսօր լուրջ մտահոգութիւն ունի, որ որեւէ խնդիր ունենալու պարագային, յատկապէս եթէ ատիկա այնպիսի մէկու մը հետ է, որ ունի քաղաքական լծակներ, արդարադատութեան հարցով չի կրնար վստահ ըլլալ: Այստեղ լուրջ մտահոգութիւն կայ նաեւ խտրական արդարադատութեան առումով, երբ առանց իրաւական հիմնաւորումներու պետական մարմինները կ’օգտագործուին ինչ-որ խնդիրներ լուծելու համար:

4. Խաղաղութիւն եւ կայունութիւն. այս հարցը բնականաբար բոլորին մտքին մէջ կայ: Այսօր աւելի, քան երբեւէ ասիկա ներդրումներու համար լուրջ խոչընդոտ է: Ատրպէյճանը անվերապահօրէն կը զինուի, խստացուցած է ռազմական հռետորաբանութիւնը, շփման գիծին վրայ զինադադարի խախտման դէպքերը յաճախակի դարձած են, իսկ բանակցային գործընթացը մտած է լուրջ փակուղի:

«Ահաւասիկ, ես կը կարծեմ, որ այս գործօններուն պէտք է նոյնքան ուշադրութիւն դարձնել, որքան տնտեսական ցուցանիշներուն, որովհետեւ սովորական քաղաքացիի առօրեայ խօսակցութեան թեմաները ասոնք են, քան ժողովուրդի մեծամասնութեան անհասանելի եւ յաճախ անընկալելի մաքրոտնտեսական ցուցանիշներն ու վերլուծութիւնները»:

Կարդացէք նաև

Ռուսիա Վճռակամ Է Իրանի Դէմ Ուժի Կիրառման Որեւէ Փորձ Արգիլելու
ՊԱՆ ՔԻ ՄՈԻՆ ԺԸՆԵՒԵԱՆ ԲԱՆԱԿՑՈՒԹԻՒՆՆԵՐԸ ՎԵՐՍԿՍԵԼՈՒ ԿԸ ՀՐԱՒԻՐԷ ՍՈՒՐԻՈՅ ՀԱԿԱՄԱՐՏՈՒԹԵԱՆ ԿՈՂՄԵՐԸ
Էդուարդ Նալպանտեան. Հայաստանը Կը Գնահատէ Իրանի Հաւասարակշռուած Դիրքորոշումը Ղարաբաղեան Հիմնախնդիրի Հ...
«25 Տարի Շարունակ Երկրին Իշխած Քաղաքական Խաւը Պատասխանատու Է Լիբանանի Պարզած Այսօրուան Իրավիճակին» Շ...
Ամերիկա Մոսկուայի Հետ Սերտօրէն Կը Համագործակցի Արցախի Տագնապի Կարգաւորման Համար. Հոկլընտ

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button