Համաշխարհային Հայկական Գոնկրէսի համագումարին Սերժ Սարգսեան Խօսած է Նաեւ Հայոց Ցեղասպանութեան եւ ԼՂ Հիմնախնդիրին Մասին

ՀՀ նախագահ Սերժ Սարգսեան մասնակցած է «Համաշխարհային հայկական Գոնկրէս» հայկական միաւորումներու միջազգային միութեան համագումարին, որ ամփոփած է հիմնադիր համագումարէն ետք` 2003-2012 թուականներու գործունէութիւնը: Այս մասին կը տեղեկացնէ Armenpress.am-ը:

«Սրտանց կ’ողջունեմ Համաշխարհային հայկական գոնկրէս հասարակական կազմակերպութիւններու միջազգային միութեան երկրորդ համագումարի մասնակիցները քաղաքամայր Երեւանի մէջ: Ուրախ եմ տեսնելու բազմաթիւ ծանօթներ եւ ընկերներ, որոնք հայրենիք ժամանած են աշխարհի տարբեր ծայրերէ համահայկական խնդիրներու օրակարգը ճշտելու եւ այդ խնդիրները բաց քննարկելու ցանկութեամբ»,- իր բացման խօսքին մէջ ըսած է ՀՀ նախագահ Սերժ Սարգսեան: Ան իր վստահութիւնը յայտնած է, որ հիմնադրուած բարեկամութիւնը ապագայ պիտի ունենայ, քանի որ համագումարի մասնակիցները կը միաւորեն շատ կարեւոր արժէքներ եւ զգացմունքներ, որոնք թոյլ կու տան հայ ժողովուրդին անցնելու պատմութեան քառուղիներով` պահպանելով հայու տեսակը:

«Մենք հազարամեակներ ունինք մեր առջեւ, որոնք պիտի անցնինք միասին: Բոլորին սրտանց կ’ուզեմ ըսել, որ բարով եկած է Հայաստան, բարով եկած էք հայրենիք: Սփիւռքը համախմբելու իւրաքանչիւր նախաձեռնութիւն անհրաժեշտ է խրախուսել եւ փայփայել: Մենք սակաւաթիւ ենք, ուստի պէտք է պայքարինք իւրաքանչիւր հայը հայ պահելու համար, որպէսզի դիմագրաւենք ուծացման վտանգը»,- շեշտած է նախագահը: Անոր խօսքով` այդ իսկ պատճառով պէտք է խրախուսուին ազգային ինքնակազմակերպման եւ փոխադարձ օգնութեան բոլոր հնարաւոր մեքենականութիւնները:

«Պէտք է նշեմ, որ այդ ուռումով մենք, իբրեւ ժովուրդ կրցած ենք որոշ յաջողութիւններ արձանագրել, անոնք յաջողութիւններ են, որոնք ոմանց հանգիստ չեն տար: Մենք ատիկա կ’ընենք ոչ թէ ուրիշները գրգռելու, այլ մեր պետական եւ համազգային բնոյթի հարցերը լուծելու համար»,- ըսած է Սարգսեան: Ան նշած է, որ այսօր աշխարհի չորս կողմերը գոյութիւն ունեցող բազմաբնոյթ հասարակական կազմակերպութիւններուն շնորհիւ է, որ մենք կրնանք խօսիլ համաշխարհային հայկական քաղաքացիական հասարակութեան մասին, ուր առկայ են ե’ւ քաղաքական, ե’ւ բարեգործական, ե’ւ մշակութային, մասնագիտական կազմակերպութիւններ, որոնց յաջողութիւններով կարելի է հպարտանալ:

«Ոչ մէկուն տրուած է ճշմարտութեան, իմացութեան կամ արդարութեան մենաշնորհը, սակայն կարեւոր է, որ բոլորը ձգտին միաւորուին այդ սկզբունքներու, ոչ թէ սեփական տեսակէտի պարտադրանքին շուրջ: Քաղաքացիական հասարակութեան ամբողջ ուժը իր բազմազանութեան մէջ է, եւ մենք պէտք է ամէն ինչ ընենք այդ բազմազանութիւնը պահպանելու ու խրախուսելու համար»,- նշած է նախագահը: Ան համոզուած է, որ ոչ պետութիւնը կրնայ փոխարինել քաղաքացիական հասարակութիւնը եւ ոչ ալ հակառակը, այլ պետութիւնը եւ քաղաքացիական հասարակութիւնը ուժեղ են զիրար ամրապնդելով եւ զօրակցելով:
«Աշխարհի շատ ժողովուրդներու ներկայացուցիչներ կ’ապրին իրենց հայրենիքէն դուրս եւ հայերու պարագային այդ իրավիճակը ազատ ընտրութեան եւ աւելի լաւ կեանք փնտռելու պատճառով չէ ստեղծուած, այլ ցեղասպանութեան եւ հայրենազրկման պատճառով»,- նշած է Սարգսեան: Կը մօտենայ Հայոց Ցեղասպանութեան 100-րդ տարելիցը, եւ, նախագահի խօսքով, մեր ժողովուրդին դէմ կատարուած յանցագործութիւնը դեռ պէտք է ստանայ իր արժանի գնահատականը: «Հայոց պետութիւնը եւ հայոց համաշխարհային քաղաքացիական հասարակութիւնը ըսելիք ունին այս խնդիրին շուրջ, սակայն ատիկա մեր օրակարգին միակ հարցը չէ: Մենք պաշտպանեցինք Արցախը մեզի պարտադրուած պատերազմին, այժմ ժամանակն է հաստատելու արդարութիւնը դիւանագիտութեան դաշտի մէջ, ուր եւս մենք կ’աշխատինք ձեռք ձեռքի տուած»,- նշած է ան:

Նախագահը շեշտած է նաեւ, որ այսօր Սուրիոյ մեր եղբայրները եւ քոյրերը յայտնուած են ծայրայեղ ծանր կացութեան մէջ, ու մենք զօրակից ենք անոնց: «Շատ բան ըրած ենք, բայց դեռ աւելին ունինք ընելու: Վստահ եմ, պիտի ընենք, եւ մեզմէ իւրաքանչիւրը ըսելիք ու ընելիք ունի, կը մաղթեմ համագումարի մասնակիցներուն արգասաբեր աշխատանք»,- իր խօսքը աւարտած է հանրապետութեան նախագահը:

«Գոնկրէսի պատուարժան անդամներ հայրապետական սիրով մեր ողջոյնն ու օրհնութիւնը կը մերենք ձեզ եւ միութեան բոլոր անդամներուն, կազմակերպիչներուն եւ մասնակիցներուն, որ վերստին համախմբուած էք հայրենիքի մէջ»,- իր հերթին ըսած է Ն.Ս. Տ.Տ. Օ. Գարեգին Բ. կաթողիկոսը:

Համաշխարհային հայկական գոնկրէսի նախագահ Արա Աբրահամեան` իր հերթին նշած է, որ հայկական քոնկրէսի գլխաւոր խնդիրներէն մէկը աջակցութիւնն էր Հայոց Ցեղասպանութեան միջազգային ճանաչման եւ դատապարտման, անոր հետեւանքներու վերացման գործընթացներուն:

Գոնկրէսը իր գործունէութեան ինը տարիներուն ընթացքին գործունէութիւն ծաւալած է բոլոր ոլորտներու մէջ, աշխոյժօրէն համագործակցելով ՀՀ սփիւռքի նախարարութեան, Գիտութիւններու ազգային ակադեմիայի այլ կարեւոր կառոյցներու հետ: Համաշխարհային հայկական գոնկրէսի երկրորդ համագումարին ներկայ եղած է 147 պատուիրակ:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button