Հայաստան Դարձաւ Ֆրանքոֆոն Երկիրներու Միջազգային Կազմակերպութեան Լիիրաւ Անդամ

Գինշասայի մէջ Հոկտեմբեր 13-14 կայացած է Ֆրանքոֆոն երկիրներու միջազգային կազմակերպութեան գագաթաժողովը, որուն կը մասնակցէին կազմակերպութեան 77 անդամ, ընկերակցուած եւ դիտորդ երկիրներու բարձրաստիճան պատուիրակութիւնները` պետութիւններու եւ կառավարութիւններու ղեկավարներու, արտաքին գործոց նախարարներու ղեկավարութեամբ: Հայաստանը գագաթաժողովին կը ներկայացնէր ԱԳ նախարար Էտուարտ Նալպանտեան: Այս մասին կը հաղորդեն ԱԳՆ մամուլի եւ տեղեկատւութեան վարչութենէն:

Գագաթաժողովին նախորդած էր Ֆրանքոֆոն երկիրներու միջազգային կազմակերպութեան արտաքին գործոց նախարարներու խորհուրդը, որ Հոկտեմբեր 11-ին միաձայն որոշում ընդունած էր Հայաստանի անդամակցութեան առաջարկը գագաթաժողովի հաստատման ներկայացնելուն վերաբերեալ:

Հոկտեմբեր 13-ին Ֆրանքոֆոն երկիրներու գագաթաժողովը որոշում կայացուցած է Հայաստանի Հանրապետութեան իբրեւ ՖՄԿ լիիրաւ անդամ ընդունելու մասին:

Հայաստանի անդամակցութեան որոշումէն ետք Էտուարտ Նալպանտեան, ելոյթ ունենալով գագաթաժողովին, ըսած է,- «Ինծի համար մեծ պատիւ է ներկայ գտնուիլ Ֆրանքոֆոնիայի 14-րդ գագաթաժողովին, ուր Հայաստան կը դառնայ Ֆրանքոֆոն երկիրներուի Միջազգային Կազմակերպութեան լիիրաւ անդամ:

Կ’ուզեմ շնորհակալութիւն յայտնել վստահութեան այս արտայայտութեան համար եւ գոհունակութիւն` մեր երկրի` ֆրանքոֆոն մեծ ընտանիքին, երկխօսութեան եւ համագործակցութեան այս լայն հարթակին միանալու առնչութեամբ:
Հպարտ ենք, որ հայկական քաղաքակրթութիւնը, մշակոյթն ու լեզուն իրենց տեղը պիտի գտնեն մշակութային եւ լեզուական բազմազանութեամբ հարուստ ֆրանքոֆոն երկիրներու ընդհանուր ժառանգութեան մէջ:

Յայտնի է, որ Հայաստանը Ֆրանսայի եւ ֆրանքոֆոն երկիրներու հետ կը կապեն առանձնաշնորհեալ յարաբերութիւններ: Մեր երկիրներու, մեր ժողովուրդներու ճակատագրերը շաղկապուած են, ժամանակի փորձութիւնը անցած եւ կոփուած խաղաղութեան, ազատութեան, ժողովրդավարութեան եւ մարդու իրաւունքներու պաշտպանութեան ընդհանուր արժէքներու հանդէպ յանձնառութեամբ:

Կազմակերպութեան լիիրաւ անդամի կարգավիճակով Հայաստանը պիտի կրնայ առաւել ամրապնդել եւ խորացնել իր համագործակցութիւնը անդամ երկիրներու հետ, աշխոյժօրէն մասնակցիլ Ֆրանքոֆոն երկիրներու աշխատանքներուն, գործել համերաշխութեան եւ ընդհանուր արժէքներուն հաւատարմութեան ոգիով:
Հայաստանը ֆրանքոֆոն երկիրներու անդամ երկիրներուն հետ միասին աշխոյժ ջանքեր պիտի գործադրէ միջազգային բեմահարթակի վրայ կազմակերպութեան դերը առաւել ամրապնդելու ուղղութեամբ»:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button