Վանի Ուրարտական Սեպագրերը Վանտալիզմի Զոհ Դարձած են

Աշխարհի ամենահին գրաւոր արձանագրութիւններէն համարուող Ուրարտուի սեպագրերը Վանի մէջ կանգնած են վերացման վտանգին առջեւ: Այս մասին կը յայտնէ Tert.am-ը` վկայակոչելով «Ռատիքալ» օրաթերթը:

Վանի բերդին մէջ 1916-ին գիտնականներ Յովսէփ Օրբելիի եւ Նիկողայոս Մառի կողմէ յայտնաբերուած 2700-ամեայ ուրարտական սեպագրերը վերացման եզրին են: Անուշադրութեան մատնուած արձանագրութիւնները վանտալիզմի զոհ դարձած են եւ գրեթէ անընթեռնելի են:

Սարդուրի 2-րդ թագաւորի արձանագրութիւնները կը թուագրուին ՔԱ. 765-735թթ., որոնք կը պատմեն արքայի Անատոլիա կատարած այցելութիւններուն մասին:

Արձանագրութիւնները փրկելու համար` Վանի «Եուզունճու եըլ» համալսարանի հնագէտները հանդէս եկած են առաջարկով: Անոնք կը նախատեսեն զանոնք տեղափոխել թանգարան` պաշտպանելու նպատակով, իսկ յուշարձանին մօտ տեղադրել անոնց կրկնօրինակները:

Վնասուած արձանագրութիւնները, սակայն, նախ անհրաժեշտ է վերականգնել:

Ուրարտական արձանագրութիւններուն վնաս հասցնողներուն դէմ հետաքննութիւն սկսած է: Արձանագրութիւնները վնասող անձերուն, եթէ անոնք յայտնաբերուին, կը սպասուի 5-10 տարուան ազատազրկում` պատմական յուշարձաններուն վնաս հասցնելու յօդուածով:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button