Այս Պահուն Էրզրումի Օդակայանին Մէջ Կը Խուզարկուի Դէպի Հալէպ Մարդասիրական Օգնութիւն Տեղափոխող Օդանաւը

Հայաստանէն այսօր առաւօտեան դէպի Սուրիա ուղեւորուած օդանաւը, որ կը տեղափոխէ մարդասիրական օգնութիւն, վայրէջք կատարած է Էրզրումի օդակայան եւ այս պահուն կը ստուգուի տեղի յատուկ ծառայութիւններուն կողմէ:

Թէեւ թրքական լրատուամիջոցները կը գրեն, թէ օդանաւը հարկադրաբար իջած է Էրզրումի օդակայան, սակայն Թուրքիոյ Արտաքին գործոց նախարարութիւնը քիչ առաջ պարզաբանած է, որ օդանաւը մարդասիրական օգնութիւն կը տեղափոխէ եւ Էրզրում իջնելը եւ ստուգումը վաղօրօք պայմանաւորուած եղած է:

“Երկիր մետիա”-ն կապ հաստատած է բեռը տեղափոխող օդանաւային ընկերութեան տնօրէնին հետ, որ մանրամասնութիւններ հաղորդած է օդանաւին մասին:

Այս պահուն ստուգման ընթացքը բնականոն է, եւ թրքական իշխանութիւնները վաղօրօք տեղեկացուած եղած են, որ օդանաւը մարդասիրական օգնութիւն կը տեղափոխէ, մասնաւորապէս, անոր մէջ կը գտնուի 15 թոն սնունդ, որ հաւաքուած է “Օգնիր եղբօրդ” նախաձեռնութեան ծիրէն ներս:

“Արտակարգ որեւէ բան չկայ եւ չի կրնար ըլլալ, քանի որ օդանաւը սնունդ կը տեղափոխէ”,- ըսած է Արսէն Աւետիսեան:

Իսկ Ազգային ժողովի ՀՅԴ պատգամաւոր, «Օգնիր եղբօրդ» նախաձեռնութեան համակարգող Վահան Յովհաննիսեան Tert.am-ին հաստատած է, որ կը զննուի «Օգնիր եղբօրդ» նախաձեռնութեան ծիրէն ներս Հալէպ ուղարկուած օգնութիւնը, սակայն նշեց, որ ոեւէ մէկը հայկական օդանաւին հարկադիր վայրէջքի չէ ստիպած: «Նախապէս համաձայնութիւն ձեռք բերուած էր, որ օդանաւը զննուի Այնթապի օդակայանին մէջ, աւելի ուշ որոշուեցաւ Էրզրումի օդակայան վայրէջք կատարել: Արտառոց ոչինչ կայ»,- ըսած է Վահան Յովհաննիսեան:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button

 

STAINLESS STEEL