Հայաստան Եւ Իրան Պիտի Իրականացնեն Տնտեսական Ոլորտի Փոխշահաւէտ Ռազմավարական Ծրագիրներ

ՀՀ Ազգային ժողովի Հանրապետական խմբակցութեան ղեկավար, Հայաստան-Իրան պատգամաւորական բարեկամական խումբի ղեկավար Գալուստ Սահակեան Հոկտեմբեր 15-ին հանդիպում ունեցաւ Հայաստանի Հանրապետութեան մէջ Իրանի Իսլամական Հանրապետութեան արտակարգ եւ լիազօր դեսպան Մոհամմատ Ռէիսիի հետ: Այս մասին կը տեղեկացնէ ԱԺ-ի Հասարակայնութեան եւ տեղեկատուութեան միջոցներու հետ կապերու վարչութիւնը:

Ողջունելով դեսպանը՝ Գալուստ Սահակեան հաւաստիացուց, որ ինչպէս Իրանի նախորդ դեսպանները, պարոն Ռէիսին նոյնպէս ջերմութեան պակաս պիտի չզգայ Հայաստանի մէջ: Երկու հարեւան երկիրներու եւ ժողովուրդներու միջեւ հազարամեակներու ընթացքին ձեւաւորուած ամուր կապերը եւ պատմական-մշակութային ընդհանրութիւնները իրական հիմք ու խթան են քաղաքական, տնտեսական ու մշակութային յարաբերութիւնները աւելի զարգացնելու համար: Երկու երկիրներու փոխգործակցութիւնը տարբեր ոլորտներու մէջ թէեւ տարիէ տարի աւելի եւ աւելի կ’ամրապնդուի եւ կը զարգանայ, բայց յարաբերութիւններու աշխուժացման հնարաւորութիւնները շատ աւելի մեծ են եւ հեռանկարային, եւ երկուստէք պէտք է ամէն ինչ ընել` զանոնք կեանքի կոչելու համար:

ՀՀԿ խմբակցութեան ղեկավարը տեղեկացուց, որ տարիներ շարունակ ինք կը ղեկավարէ Հայաստան-Իրան բարեկամական խումբը, քաջատեղեակ է երկու երկիրներու քաղաքական եւ տնտեսական հիմնախնդիրներուն եւ միշտ կողմ եղած է ու ամէն ինչ ընելու` ամրապնդելու կառուցողական ու փոխշահաւէտ համագործակցութիւնը: Ան կարեւորեց խորհրդարանական ու ժողովրդական դիւանագիտութեան դերը երկու երկիրներու արդիւնաւէտ եւ կայուն յարաբերութիւններու զարգացման գործին:

Իրանի Իսլամական Հանրապետութեան դեսպան Մոհամմատ Ռէիսի շնորհակալութիւն յայտնեց ջերմ խօսքերուն եւ ընդունելութեան համար եւ հաւաստիացուց, որ երկկողմ յարաբերութիւններու զարգացման հեռանկարներուն մասին նոյն տեսակէտը ունին նաեւ Իրանի իշխանութիւնները: Ան յոյս յայտնեց, որ պիտի իրականացուին տնտեսական ոլորտի փոխշահաւէտ ռազմավարական ծրագիրներ, որոնց հետ կապուած խնդիրները հանգամանօրէն պիտի քննարկուին միջկառավարական յանձնաժողովի յառաջիկայ նիստի ընթացքին, պիտի յստակեցուին ժամկէտները եւ ընելիքները:

Իրանի դեսպան Մոհամմատ Ռէիսի Գալուստ Սահակեանին ներկայացուց Իրանի խորհրդարանի Իրան-Հայաստան բարեկամական խումբի նոր կազմը` փոխանցելով նաեւ խումբի անդամներուն` հայ գործընկերներուն հետ աշխոյժ համագործակցելու պատրաստակամութիւնը:

Հանդիպումի ժամանակ քննարկուեցան նաեւ խորհրդարանական համագործակցութեան, քաղաքական ու տնտեսական յարաբերութիւններուն ու տարածաշրջանային խնդիրներուն վերաբերող այլ հարցեր:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button