ՀՀ Նախագահը Ներկայ Գտնուած է Գինիի Նորակառոյց Գործարանի Բացման

ՀՀ նախագահ Սերժ Սարգսեան Հոկտեմբեր 15-ին աշխատանքային այցով կը գտնուէր Արագածոտնի մարզ: Այս մասին կը հաղորդէ Aysor.am-ը: Նախագահը այցելած է “Կոլտըն Կրէյփ Արմաս” գինիի-քոնեակի նորակառոյց գործարան, մասնակցած գործարանի բացման արարողութեան: ՀՀ նախագահին ուղեկցած են ՀՀ գիւղատնտեսութեան նախարար Սերգօ Կարապետեան, ՀՀ տնտեսութեան նախարար Տիգրան Դաւթեան, ՀՀ տարածքային կառավարման նախարար Արմէն Գէորգեան եւ պաշտօնատար այլ անձինք:

Նախագահ Սարգսեան շրջած է գործարանի տարածք, ծանօթացած ընկերութեան կարողութիւններուն:

“Կոլտըն Կրէյփ Արմաս” գործարանի սեփականատէր Արմէն Ասլանեան լրագրողներուն տեղեկացուցած է, որ այս տարի առաջին անգամ ընդունած են 1000 թոն խաղող, որուն 525 տոնը Արագածոտնի մարզի Կոշ, Ագարակ, Սասունիկ համայնքներէն, 50 թոնը Եղէգնաձորէն Արենի տեսակի խաղող, իսկ մնացեալը` գործարանի ունեցած սեփական խաղողի այգիներու խաղողն է:

Խաղողը մթերած է 140 դրամով, իսկ Արենի տեսակի խաղողը` 230 դրամով, սեփականատէրը նաեւ հաղորդած է, որ գումարները վճարուած են, իսկ պատրաստ արտադրանքը, որ պատրաստ պիտի ըլլայ քանի մը ամիսէն` պիտի արտահանուի ԱՄՆ, Ռուսաստան, Ուքրանիա, Եւրոպա, արդէն համապատասխան համաձայնութիւններ կան:

Գործարանը յագեցած է ժամանակակից ճարտարագիտութիւններով, կ’աշխատին իտալացի մասնագէտներ: Ներկայիս կը կառուցուի նաեւ 10-15 հազար խմ տարողութեամբ ջրամբար, տարածքին մէջ տեղադրուած է նաեւ հակակարկտային երեք կայան:

Արմէն Ասլանեան նշած է միայն, որ տարածքին մէջ համացանց չկայ, հակառակ անոր, որ գործարանին մէջ կան համակարգիչներ, բայց աշխատանքը կը դժուարանայ:

Նշենք, որ ընկերութեան ներդրումները կազմած է շուրջ 15 միլիոն եուրօ: Գործարանին մէջ կ’աշխատի շուրջ 200 մարդ: Կը նախատեսուի զարգացնել հողատնտեսական զբօսաշրջութիւնը, հիմնել հիւթերու, անուշներու գործարան, խաղողի սառնարաններ, բանաջարեղէնի ջերմոցներ, անասնաբուծական ագարակներ եւ ձկնաբուծարան:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button
 

STAINLESS STEEL

 

–>