Սուրիահայերը Պէտք է Զինուորական Ծառայութեան Անցնին Ինչպէս ՀՀ Բոլոր Քաղաքացիները. Հրանոյշ Յակոբեան

Հայաստանի Հանրապետութեան տարածքին գտնուող սոուրիահայերուն` հարկային եւ այլ պարտաւորութիւններէ ազատելու իբրեւ արդիւնք` երկրի պիւտճէի մուտքերը 1,5 միլիոն տոլարով պակաս են: Այսօր կայացած մամուլի ասուլիսի մը ընթացքին` ամփոփելով գերատեսչութեան չորս տարիները` այս մասին, ըստ Panorama.am-ի, յայտնած է Սփիւռքի նախարար Հրանոյշ Յակոբեան` շեշտելով, որ որոշ լրատուամիջոցներ` սուրիական ճգնաժամի առաջին օրերուն կը փորձէին վարկաբեկել ոչ միայն Սփիւռքի նախարարութիւնը, այլ նաեւ` ՀՀ կառավարութիւնը:
«Եթէ կարող էք բերել մի սփիւռքահայի, ով կ’ասի, թէ Սփիւռքի նախարարութիւնը չի ընդառաջել որեւէ հարցում, եթէ օդանաւակայանից չեն դիմաւորել, ես անյապաղ կը հեռացնեմ աշխատանքից թերացած աշխատակցին»,- ըսած է Հ. Յակոբեան:

Նախարարի խօսքով` առաջին իսկ օրերէն` դեռ 2011-ին, նախարարութեան նախաձեռնութեամբ իրականացած էր սուրիահայ համայնքի գիտական ուսումնասիրութիւն` հասկնալու, թէ ինչպիսի զարգացումներ կրնան վտանգել զայն եւ ինչ մարտահրաւէրներու առաջ կանգնած է սուրիահայութիւնը:

«Այդ երկրում ներքաղաքական առճակատման առաջին օրերին մենք կոչ էինք անում համայնքին զերծ մնալ եւ պահպանել քաղաքական չէզոքութիւնը: Չէինք ուզում հանել ընդդիմութեանը մերոնց դէմ»,- ըսած է նախարարը:

Անոր խօսքով` նախարարութեան նախաձեռնութեամբ եւ համակարգմամբ ստեղծուած է «Սուրիահայերու հիմնախնդիրները համակարգող աշխատանքային խումբ», իսկ օրերս` «Սուրիահայերու հիմնախնդիրները համակարգող կեդրոն» հասարակական կազմակերպութիւնը, որուն գործունէութիւնը միտուած է աջակցելու սուրիահայերուն: Ան նաեւ գոհունակութեամբ յիշատակած է Հ.Յ.Դաշնակցութեան «Օգնիր եղբօրդ» նախաձեռնութիւնը:

Նախարարը նշած է, որ Դամասկոսի եւ Հալէպի մէջ արդիւնաւէտ կերպով կը գործեն ՀՀ դիւանագիտական առաքելութիւնները, սփիւռքի նախարարութեան ներկայացուցիչները:

«Այն վայրերում, որտեղ ռազմական գործողութիւններ չկան, մէք փորձում ենք համալրել ուժերը, իսկ որտեղ պատերազմ է` աջակցել դեղորայքով եւ սնունդով»,- ըսած է ան:

Նախարարը շեշտած է, որ սուրիահայերը, եթէ երկքաղաքացի են, ունին նոյն իրաւունքները եւ պարտականութիւնները, ինչպէս ունին ՀՀ միւս քաղաքացիները: Այդ ծիրէն ներս ան ընդգծած է, որ 18 տարեկան լրացած արական սեռի բոլոր ՀՀ քաղաքացի սուրիահայերը` ըստ Սահմանադրութեան յօդուած 47-ի, պարտաւոր են ծառայութիւն անցնելու հայոց բանակին մէջ:

«Սիրիահայերի համար նախատեսուած են պարտադիր ժամկետային ծառայութիւնից ազատուելու եւ տարեկէտման նոյն իրաւունքները, ինչ եւ ՀՀ միւս քաղաքացիների համար: Մենք առանց այդ էլ շատ ֆինանսական արտօնութիւններ ենք տուել»,- նշած է Հ. Յակոբեան:

Միւս կողմէ, խումբ մը հայ երիտասարդներ` հալէպահայութեան առջեւ ծառացած մարտահրաւէրը դիմակայելու իրենց վճռակամութեան գործնական փաստը տուած են այսօր: Այս մասին կը հաղորդէ Բերիոյ թեմի տեղեկատուական կայքը:

Հայ երիտասարդները, մարդկայնական զգացումներով եւ քաղաքացիական բարձր գիտակցութեամբ զինուած, սննդեղէն բաժնած են Հալէպի մէջ բախումներու թատերաբեմ դարձած Ճիտէյտէ թաղամասին մէջ:

Այդ տղաքը` կրակոցներուն եւ պայթումներուն այդքան մօտ ըլլալով` կրցած են կարօտեալներուն սննդեղէն հասցնել:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button