Պուլկարիան Կողմ է ԼՂ Խնդիրի Խաղաղ Կարգաւորման. Պուլկարիոյ ԱԺ Նախագահ

Պուլկարիոյ մօտ Հայաստանի դեսպան Արսէն Սհոյեան հանդիպած է Պուլկարիոյ Ազգային Ժողովի նախագահ տիկին Ցեցգա Ցաչեւային: Այս մասին կը հաղորդեն Պուլկարիոյ մէջ Հայաստանի դեսպանատան մամլոյ ծառայութենէն:

Դեսպան Արսէն Սհոյեան փոխանցած է ՀՀ ԱԺ նախագահ Յովիկ Աբրահամեանի նամակը` ուղղուած տիկին Ցաչեւային եւ կից` ՀՀ Ազգային Ժողովի յայտարարութիւնը` 2004 Փետրուարին Պուտափեշտի մէջ ՆԱԹՕ-ի դասընթացներուն ժամանակ հայ սպայ Գուրգէն Մարգարեանը սպաննած յանցագործը Հունգարիայի իշխանութիւններուն կողմէ Ատրպէյճանին փոխանցելու եւ Ատրպէյճանի նախագահին կողմէ վերջինիս ներում շնորհելուն առնչութեամբ:

Պուլկարիոյ ԱԺ նախագահը, իր հերթին յայտնած է, որ լաւատեղեակ է խնդիրին, եւ որ Պուլկարիոյ իշխանութիւններուն վերաբերմունքը համահունչ է Եւրոմիութեան արտաքին յարաբերութիւններու եւ անվտանգութեան քաղաքականութեան հարցերով գերագոյն յանձնակատար Քեթրին Էշթօնի յայտնած դիրքորոշման:

Հանդիպման ընթացքին ՀՀ դեսպանը ներկայացուցած է Լեռնային Ղարաբաղի հակամարտութեան կարգաւորման վերջին զարգացումները եւ անդրադարձած ԼՂ-ի մէջ վերջերս կայացած նախագահական ընտրութիւններուն: Պուլկարիոյ ԱԺ նախագահը ողջունած է ղարաբաղեան խնդիրին կարգաւորմանը բանակցային ճանապարհով հասնելու Հայաստանի ջանքերը եւ նշած, որ Պուլկարիան մշտապէս կողմ եղած է հարցին խաղաղ կարգաւորման:

Տիկին Ցաչեւա բարձր գնահատած է Պուլկարիոյ մէջ հայ համայնքի դերակատարութիւնը եւ յայտնած իր պատրաստակամութիւնը` մշտապէս աջակցելու պուլկարահայերուն իրենց բազմաթիւ նախաձեռնութիւններուն մէջ: Վերջինս վերահաստատած է ՀՀ ԱԺ նախագահ Յովիկ Աբրահամեանի` Պուլկարիա այցելելու հրաւէրը` իրեն յարմար ժամանակաշրջանին, նշելով որ այցը լրացուցիչ խթան պիտի հանդիսանայ բարձր կապերու խորացման ու զարգացման համար:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button