Արցախի Հակամարտութիւնը Կը Մօտենայ «Լարուածութեան Անթոյլատրելի Շեմին»

0
32

 Հարաւային Կովկասի մէջ Եւրոմիութեան նախկին յատուկ ներկայացուցիչ, իսկ այժմ Աֆղանիստանի մօտ Շուէտի դեսպան Փիթըր Սեմնեպի, խօսելով ղարաբաղեան հակամարտութեան մասին՝ դիտել տուած է, թէ տագնապը կը հասնի «լարուածութեան անթոյլատրելի շեմին»:
«Ներկայիս, քանի մը տարի առաջուան համեմատ, վտանգը շատ աւելի բարձր է: Թէ՛ այն ժամանակ, երբ յատուկ ներկայացուցիչ էի եւ թէ հիմա, իմ հիմնական ուղերձն ու կոչը Եւրոպային հետեւեալն է. ասիկա հակամարտութիւն մըն է, որուն հետ պէտք է լրջութեամբ վերաբերիլ: Եւրոպան պէտք է լուրջ ջանքեր գործադրէ ղարաբաղեան հակամարտութիւնը խաղաղ ճանապարհով լուծելու համար», ըսած է ան, Պոլսոյ մէջ կայացող գիտաժողովի մը ընթացքին:
«Մեծ է վտանգը, որ իւրաքանչիւր միջադէպ կրնայ իրավիճակը հսկողութենէ դուրս բերել: Մենք կը տեսնենք այդպիսի միջադէպեր, որոնք կրնան լարուածութիւնը սրել: Ի հարկէ, այս կացութիւնը պէտք է մտահոգէ առաջին հերթին հակամարտութեան կողմերը, բայց միջազգային գործընկերները նոյնպէս պէտք է հաշուի առնեն դրութիւնը, քանի որ եթէ Լեռնային Ղարաբաղի մէջ բան մը պատահի, անոր հետեւանքները պիտի ազդեն նաեւ Եւրոմիութեան անդամ երկիրներուն վրայ», աւելցուցած է ան:
«Ազատ Օր»ը կը հաղորդէ, որ նոյն գիտաժողովին ընթացքին ելոյթ ունեցած Թուրքիա-Եւրոմիութիւն հարցերով զբաղող Ֆուատ Կայմանը նշած է, որ հայ-թրքական յարաբերութիւններուն մէջ Հայոց Ցեղասպանութեան ճանաչման հարցը հիմնական խոչընդոտներէն մէկն է: «Անշուշտ, որ ան խոչընդոտ է, բայց Թուրքիա մեծ առաջընթաց կ՛արձանագրէ այս հարցով: Չեմ կարծեր, թէ Թուրքիան օր մը պաշտօնապէս կ՛ընդունի ատիկա, բայց Թուրքիոյ մէջ, օրինակ, շատ են հեղինակները, որոնք կը գրեն այդ մասին. անոնց հետ ոչինչ կը պատահի: Մարդիկ կը սկսին տեղեկանալու 1915-ի ողբերգական իրադարձութիւններուն մասին: Ասիկա արդէն որոշ յառաջընթաց մըն է», ըսած է թուրք քաղաքագէտը:

   Միւս կողմէ, Թուրքիոյ արտաքին գործոց նախարար Ահմէտ Տաւուտօղլու,
պատասխանելով այն հարցումին, թէ Թուրքիա ինչպիսի՞ քայլերու պիտի դիմէ Ստեփանակերտի օդակայանի բացման պարագային՝ յայտարարած թէ,  Անգարա արդէն արտայայտած է իր դիրքորոշումը:
«Օդակայան բանալու մտադրութիւնը բացասական քայլ է: Թուրքիա արդէն իսկ դատապարտած է այդ գործողութիւնը եւ յայտարարած, որ այդ քայլը անթոյլատրելի է: Այդ քայլը կրնայ վնասել ղարաբաղեան հակամարտութեան խաղաղ կարգաւորման: Մենք այդ հարցի կապակցութեամբ արդէն խորհրդակցութիւններ կատարած ենք ատրպէյճանական կողմին հետ: Չեմ կարծեր, որ այդ քայլը դրական արդիւնք պիտի տայ: Այդ հարցը պէտք է լուծուի միջազգային իրաւունքի շրջանակներուն մէջ»:

LEAVE A REPLY

Please enter your comment!
Please enter your name here