Սերժ Սարգսեանի Ցաւակցական Հեռագիրը` Երուսաղէմի Պատրիարքին Վախճանման Առիթով

ՀՀ նախագահ Սերժ Սարգսեան ցաւակցական հեռագիր յղած է Ամենայն Հայոց Կաթողիկոս Ն.Ս.Օ.Տ.Տ. Գարեգին Բ.-ին` Երուսաղէմի Սուրբ Աթոռի Պատրիարք Տէր Թորգոմ արքեպիսկոպոս Մանուկեանի վախճանման առիթով: Այս մասին կը հաղորդեն Մայր Աթոռ սուրբ Էջմիածինի տեղեկատուական համակարգէն:

Հեռագրին մէջ, մասնաւորապէս, ըսուած է.

«Վեհափառ Տէր,
Խոր վշտով տեղեկացայ Երուսաղէմի Սուրբ Աթոռի Պատրիարք Տէր Թորգոմ արքեպիսկոպոս Մանուկեանի ցաւալի վախճանին մասին:

Երկար տասնամեակներ գլխաւորելով Երուսաղէմի Հայոց պատրիարքութիւնը եւ անմնացորդ ծառայելով իր ժողովուրդին ու հաւատքին` Տէր Թորգոմ արքեպիսկոպոս Մանուկեան անգնահատելի ներդրում ունեցաւ ինչպէս հայ ժողովուրդի հոգեւոր արժէքներու տարածման, այնպէս ալ տարբեր կրօններու միջեւ հանդուրժողականութեան եւ առողջ երկխօսութեան մթնոլորտի ձեւաւորման գործին: Մեծ մտաւորականի, Հայ Առաքելական եկեղեցւոյ նուիրեալ հետեւորդի լուսաւոր յիշատակը միշտ վառ պիտի մնայ մեր սրտերուն մէջ:

Խորապէս կը ցաւիմ անդառնալի կորստեան համար եւ անկեղծօրէն կը կիսեմ Հայ Առաքելական եկեղեցւոյ բոլոր հաւատաւորներուն վիշտը: Բոլորիս համար այս ծանր պահուն թող Բարձրեալը մեր հոգիներուն տոկունութիւն եւ հոգեւոր խաղաղութիւն սփռէ”:

Թորգոմ Արքեպիսկոպոս Մանուկեան ստացած է շարք մը ակադեմիական պարգեւներ, արժանացած է Նիւ Եորքի Ընդհանուր Աստուածաբանական Ճեմարանի պատուաւոր դոկտորի կոչման:

1986-ին ստացած է նաեւ Ամերիկայի երկու գլխաւոր պարգեւները. “Ազատութեան Արձան” եւ “էլիզ Այլընտ” պատուոյ շքանշանները:

Թորգոմ Պատրիարքը մեծ աւանդ ունեցած է միջազգային էկումենիկ յարաբերութիւններու զարգացման գործին: Ան ծառայած է ԱՄՆ-ի մէջ Քրիստոսի Եկեղեցիներու Ազգային Ժողովի յանձնաժողովին մէջ, նախագահած է “կրօնն ամերիկեան կեանքին մէջ” խորհուրդը: Եղած է նաեւ “խղճմտանքի կոչ” հիմնադրամի տնօրէններու խորհուրդի անդամ:

Թորգոմ Պատրիարքը հեղինակ է 20 մենագրութիւններու, որոնց մէջ` բանաստեղծական երեք ժողովածու, հայկական Ս. Պատարագի ուսումնասիրութիւն, հայոց Մեծ Եղեռնին նուիրուած գիրքեր եւ Երուսաղէմի սուրբ վայրերու մանրամասն ուղեցոյց: Պատրիարք Հայրը ճանչցուած կոմիտասագէտ էր:

Նախօրէին Մայր տաճարի մէջ կատարուած է հոգեհանգստեան արարողութիւն:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button

 

STAINLESS STEEL