Հունգարացի Պատգամաւորը Դիւանագիտական Մեծ Սխալ Համարած է Ատրպէյճանի Նախագահի կողմէ Մարդասպանի Հերոսացումը

ԱԺ արտաքին յարաբերութիւններու մշտական յանձնաժողովի նախագահ Արտակ Զաքարեան երէկ Պուխարեսթի մէջ հանդիպած է Ռումանիոյ խորհրդարանի ստորին պալատի ազգային փոքրամասնութիւններու խորհրդարանական խմբակցութեան ղեկավար, ռումանահայ համայնքի ղեկավար Վարուժան Փամպուգչեանի հետ: Այս մասին կը հաղորդեն ԱԺ արտաքին յարաբերութիւններու մշտական յանձնաժողովէն:

Զրուցակիցները քննարկած են Հայաստան-Ռումանիա խորհրդարանական բարեկամական խումբի աշխատանքներուն աշխոյժացման, խորհրդարանական մակարդակով կապերու զարգացման, խորհրդարանականներու կողմէ բարձրացուող երկկողմ հետքրքրութիւն ներկայացնող հարցեր:

Վարուժան Փամպուգչեան ներկայացուցած է ռումանահայ համայնքի ընթացիկ աշխատանքները, նշուած են համայնքի հիմնախնդիրները, Հայաստանի հետ գործակցութեան ոլորտներն ու այդ ուղղութեամբ իրականացուելիք հրատապ աշխատանքները:
Այնուհետեւ Արտակ Զաքարեան հանդիպած է նաեւ իր գործընկերոջ` Ռումանիոյ խորհրդարանի արտաքին գործերու մշտական յանձնաժողովի նախագահ Լասլօ Պորպելիի հետ:

Հանդիպման ընթացքին քննարկուած է երկու յանձնաժողովներու միջեւ համագործակցութիւն հաստատելու հարցը, որ հնարաւորութիւն պիտի տայ նպաստելու խորհրդարանական տարբեր հարթակներու վրայ փոխադարձ աջակցութեան ու համատեղ ձեռնարկներով հանդէս գալուն:

Արտակ Զաքարեան ներկայացուցած է Հայաստանի արտաքին քաղաքական առաջնահերթութիւնները, Ղարաբաղեան հիմնախնդրի կարգաւորման գործընթացը եւ այնտեղ Ատրպէյճանի ապակառուցողական մօտեցումները:

Լասլօ Պորպելի եւս կարեւոր համարած է խորհրդարանականներուն միջեւ յարաբերութիւններու աշխոյժացումն ու համագործակցութիւնը եւ պատրաստակամութիւն յայտնած է նպաստելու երկուստէք այցելութիւններու եւ համատեղ ծրագրերու իրականացման:

Ըլլալով “Ռումանիոյ մէջ հունգարացիներու դեմոկրատական միութիւն” կուսակցութեան ներկայացուցիչ եւ հունգարացի, Լասլօ Պորպելի ափսոսանք յայտնած է կատարուածին համար եւ դիւանագիտական մեծ սխալ համարած է Ատրպէյճանի նախագահին կողմէ մարդասպանը փառաբանելու եւ հերոսացնելու քայլերը:

Արտակ Զաքարեան Պուխարեսթ մէջ այսօր կը մասնակցի Եւրոպայի Ժողովրդական կուսակցութեան քաղաքական ասամպլէայի աշխատանքներուն:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button

 

STAINLESS STEEL