«Բազմազգ Վրաստան»-ը Հայ Բանտարկեալներու Հարցով Նոր Կառավարութեան Պիտի Դիմէ

«Բազմազգ Վրաստան» հասարակական կազմակերպութիւնը յառաջիկային պիտի հանդիպի «Վրացական երազանք» կուսակցութիւններու միախառն դաշնութեան առաջնորդ Բիձինա Իւանիշվիլիի ձեւաւորուող գրասենեակի անդամներէն Արդարադատութեան նախարար Թոզար Սուպարիի հետ` քննարկելու Ռուսաստանի կողմէ Աբխազիոյ սահմանը հատելու համար դատապարտուած ՀՀ քաղաքացիներուն խնդիրը: Այս մասին կը հաղորդէ Tert.am-ը` վկայակոչելով «Բազմազգ Վրաստան» հասարակական կազմակերպութեան նախագահ Առնոլտ Ստեփանեանի խօսքերը:

«Հիմա շատ դժուար է ասել` նման քանի՞ հայ եւ ՀՀ քաղաքացի բանտարկեալ կայ, քանի որ էդ փրոցեսներից յետոյ, մեր տուեալներով, նրանք էդքան էլ շատ չեն: Շատ էին 2009 եւ 2010 թուականներին»,- ըսած է Առնոլտ Ստեփանեան` աւելցնելով, որ այնուհետեւ սկսած է անոնց ազատ արձակելու գործընթացը:

Նշենք, որ քանի մը տարի առաջ Վրաստանի Քրէական օրէնսգիրքին մէջ կատարուած փոփոխութիւններուն հետեւանքով` Ռուսաստանի տարածքով Աբխազիոյ սահմանը հատածները կը համարուին քրէօրէն հետապնդելի, քանի որ Վրաստան կը համարէ, որ անոնք իր տարածք մուտք գործած են առանց իր թոյլտւութեան:

Ինչպէս երէկ հաղորդած էր «ԵՌԱԳՈՅՆ»-ը` «Վրացական երազանք»-ի առաջնորդ Բիձինա Իւանիշվիլին օրերս հանդիպում ունեցած է հայ համայնքի ներկայացուցիչներուն հետ:

Առնոլտ Ստեփանեան նաեւ մանրամասնած է, որ յայտնի հայ թարգմանիչ Կիւի Շահնազարի յոբելինական երեկոյին առիթով տեղի ունեցած հանդիպման ներկայ եղած են Վրաստանի մէջ բնակող հայ համայնքի մտաւորականութեան եւ հասարակական կազմակերպութիւններու ներկայացուցիչները:

Ներկայ եղած են նաեւ Վիրահայոց թեմի առաջնորդ Վազգէն եպիսկոպոս Միրզախանեանն ու «Վրացական երազանք»-ի կողմէ ընտրուած հայ պատգամաւորները:

Ըստ Առնոլտ Ստեփանեանի` իրենց կողմէ բարձրացուած հարցերը յատկապէս վերաբերած են Վրաստանի մէջ հայկական թատրոնի գործունէութեան, Վիրահայոց թեմի ենթակայութեան տակ գտնուող հայկական եկեղեցիներուն, հայկական դպրոցներուն եւ «քաղաքական որոշ հարցեր»:

«Շատ պոզիտիւ խօսեց հայերի մասին, երեւաց որ շատ բան գիտի եւ Իւանիշվիլիի հիմնական ասելիքն այն էր , որ Վրաստանի նոր իշխանութիւնը պատրաստ է աշխատել հայերի հետ վերջին տարիներին կուտակուած հարցերը կարգաւորելու ուղղութեամբ: Եկեղեցիների մասով ինքն ասաց, որ դէմ չէ ու իրենից առաջ էլ ոչ ոք դէմ չէր , որ Վրաստանում հայկական եկեղեցի կառուցուի»,- նշած է Առնոլտ Ստեփանեան:

Անդրադառնալով չգործող եւ փլուզման եզրին կանգնած հայկական հինգ եկեղեցիներուն` Թիֆլիսի Նորաշէն, Կարմիր Աւետարան, Սուրբ Նշան, Սուրբ Գէորգ Մուղնի, Սուրբ Մինաս եւ Ախալցխայի եկեղեցիին` Առնոլտ Ստեփանեան համաձայնութիւն ունի Վրաստանի մշակոյթի ապագայ նախարարի հետ` Հոկտեմբերի վերջը հանդիպելու եւ աւելի մանրամասն խօսելու անոնց յետագայ ճակատագրին մասին:

Հիմնական պահանջը այն է, որ նախ կատարուին ամրացման աշխատանքներ, որմէ ետք միայն պիտի բարձրացուի «վերանորոգման եւ վերադարձման» հարցը:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button

 

STAINLESS STEEL