Հայոց Ցեղասպանութեան Ցաւը Արտայայտուած է Ձայնիս Մէջ. Սերժ Թանգեանի Հարցազրոյցը Huffinghton Post-ին

 Ամերիկեան հեղինակաւոր Huffinghton Post հանդէսը հրապարակած է աշխարհահռչակ հայ երաժիշտ Սերժ Թանգեանի հետ հարցազրոյցը, ուր երաժիշտը խօսած է իր նոր ալպոմին` Harakiri-ի, System of a Down-ի հետ համատեղ շրջագայութեան եւ հայ ժողովուրդի դառն անցեալին` իր ձայնին վրայ ունեցած ազդեցութեան մասին: Այս մասին կը հաղորդէ Tert.am-ը:

«Երբ առաջին անգամ System of a Down ռոք խումբը ներկայացուց իր անդրանիկ «հիթ»-ը, ակնյայտ զգացուեցաւ, որ անոնց երաժշտութիւնն ու զգացմունքայնութիւնը այլ արմատներ ունին, միանգամայն կու գան այլ տեղէ մը: Սերժ Թանգեանի ձայնին մէջ «կ’աղաղակէ» մշակութային պատմութիւնը, որ, բացի զուարճացնելէ, նաեւ կը կրթէ: Կը կարծեմ, որ շատ շատեր չէին իմանար Հայոց Ցեղասպանութեան մասին, եթէ չըլլար Թանգեանի աշխոյժ գործունէութիւնը»,- նախաբանին մէջ գրած է լրագրող Էնտրիւ Ֆիշ:

Անդրադառնալով երաժշտական ասպարէզին` Ֆիշ նշած է, թէ «Թանգեանի վերջին ալպոմին մէջ` Harakiri-ի մէջ, երաժշտութեան միջոցով Թանգեան կը խօսի այնպիսի հրատապ թեմաներու մասին, ինչպէս շրջակայ միջավայրի քայքայումը, իսրայէլապաղեստինեան հակամարտութիւնը, իրապատում հաղորդումներով յագեցած հեռուստատեսութիւնը եւ ամերիկեան ընկերակցութիւնները, որ կը ստեղծէ միջավայր մը, ուր խոշոր ընկերակցութիւնները չափէն աւելի մեծ ազդեցութիւն կ’ունենան երկրին մէջ իրականացուող քաղաքական որոշումներուն վրայ»:

Ալպոմի վերնագրի ընտրութեան հարցով Թանգեանը «ներշնչած» է 2011-ին ձուկերու եւ թռչուններու զանգուածային վերացումը, որ երաժիշտը կը բնութագրէ իբրեւ «Հարակիրի»` սամուրայներու աւանդական անձնասպանութիւն:

System of a Down-ի հետ համաշխարհային շրջագայութեան անդրադառնալով՝ Թանգեան ժպիտով ըսած է, թէ չի գիտեր` ինչպէս պատահած է այդ մէջկը: Ան նշած է, որ միշտ կապի մէջ եղած է խումբի միւս անդամներուն հետ, եւ որ անոնք բազմիցս համատեղ շրջագայութեան առաջարկներ ստացած են, սակայն իրենց ծրագիրներու անհամատեղութեան պատճառով ատիկա տեղի չէր ունենար: Վերջիվերջոյ բոլորը համաձայնած են միասին հանդէս գալ, եւ սկիզբը ծրագրած են քանի մը ելոյթր ունենալ Լոս Անճելըսի մէջ, սակայն իբրեւ արդիւնք ատիկա վերածուած է համաշխարհային շրջագայութեան:

Հարցազրոյցի աւարտին լրագրողը Թանգեանին ուղղած է հետեւեալ հարցը,- «Զիս միշտ հետաքրքրած է ձեր անցեալին ունեցած ազդեցութիւնը ձեր ձայնին վրայ»:

«Կը կարծեմ, որ անցեալիս` ձայնիս վրայ ունեցած ազդեցութիւնը կ’արտայայտուի մելամաղձոտութեամբ, որ, անշուշտ, բնորոշ է ժողովուրդիս, հայ ժողովուրդին, որ 600 տարի շարունակ ապրած է ուրիշներու տիրապետութեան տակ: Հայոց Ցեղասպանութեան ցաւը եւս արտայայտուած է իմ ձայնիս մէջ: Ատիկա երեւոյթ մըն է, որ ինծի համար շատ բարդ է բացատրել»,- ըսած է Թանգեան:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button
 

STAINLESS STEEL

 

–>