Հայաստանի Մէջ Երրորդ եւ Չորրորդ Երեխայի Ծնունդին Համար Պիտի Տրուի Մէկ Միլիոն Դրամ

Հայաստանի մէջ 2014-էն սկսեալ երրորդ եւ չորրորդ երեխայի ծնունդի պարագային պիտի տրամադրուի 1 միլիոն, իսկ հինգ եւ աւելի երեխաներու համար 1.5 միլիոն դրամ միանուագ նիւթական աջակցութիւն: Այս մասին, ըստ «Armenpress.am»-ի, նշած է ՀՀ աշխատանքի եւ հասարակական հարցերու նախարարութեան Ժողովրդագրութեան բաժինի պետ Վանիկ Պապաճանեան: Ըստ անոր, այս նպատակով ՀՀ կառավարութեան 2013-2015 միջնաժամկէտ ծախսային ծրագիրով նախատեսուած են միջոցներ: Այդ քայլով կառավարութիւնը լրջագոյն խթան կը ստեղծէ ծնունդներու աւելնալուն համար: Անհրաժեշտ է պահպանել այն դրական քայլը, որ ակնյայտ է Հայաստանի մէջ վերջին տասը տարիներուն:

Եթէ 2002-ին Հայաստանի մէջ ծնած է 32.229 երեխայ, 2011-ին այդ թիւը հասած է 43.340-ի: 2002-2010-ի վիճակագրական արդիւնքները ցոյց կու տան, որ գրեթէ ամէն տարի նախորդ տարուան համեմատ աւելցած է ծնելիութեան մակարդակը: Վանիկ Պապաճանեանի գնահատմամբ` 2002-2010-ին ծնելիութեան աճը կապուած է սեռատարիքային համամասնութիւններու հետ: «Այդ տարիներին «ամուսնական շուկայ» է մտել մեծաթիւ կոնտինգենտ: Այսինքն` ամուսնական տարիքի երիտասարդների թիւը բաւականին բարձր էր: Բացի դրանից, դրա վրայ իր ազդեցութիւնն է թողնում նաեւ երկրի սոցիալ-տնտեսական վիճակը»,- ընդգծած է Պապաճանեան` աւելցնելով, որ 2009-2010-ին նկատուած է երրորդ եւ յաջորդ երեխայ ունենալու լուրջ միտում:
Ծնելիութեան աւելնալուն դրական կողմերէն է նաեւ հասարակութեան արագ ծերացման կանխումը:

Հայաստանի ազգային վիճակագրական ծառայութեան մարդահամարի եւ ժողովրդագրութեան բաժինի պետ Կարինէ Գույումճեանի տեղեկացմամբ` այս տարուան Յունուար-Յունիսին` 2011-ի նոյն ժամանակաշրջանին համեմատ, կենդանի ծնունդներուն թիւը կազմած է 19.183: «Վեց ամսուայ կտրուածքով 2011-ի նոյն ժամանակաշրջանի համեմատ ծնունդների ցուցանիշը նուազել է 4.1 տոկոսով»,- ըսած է Գույումճեան:

Ցուցանիշին նուազումը Վանիկ Պապաճանեան կը կապէ ճգնաժամին եւ հասարակական վիճակին հետ: «Դրանք գործօնային ազդեցութիւններ են, որոնք կարելի է շտկել»,- նշած է ան` յոյս յայտնելով, որ ՀՀ կառավարութեան ձեռնարկած քայլերը պիտի տան դրական արդիւնքներ:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button

 

STAINLESS STEEL