Աւստրիացի Մտաւորականները Հայանպաստ Գործունէութեան Համար Պարգեւներու Արժանացած են

Հայաստանի կրթութեան եւ գիտութեան նախարար Արմէն Աշոտեան այսօր ընդունած է Հայաստան գտնուող Աւստրիոյ կրթութեան, գիտութեան եւ մշակոյթի ոլորտի խումբ մը ներկայացուցիչներ: Այս մասին կը յայտնեն ԿԳՆ մամուլի ծառայութենէն:

Ողջունելով հիւրերը` նախարարը յոյս յայտնած է, որ Հայաստան կատարած այցելութիւնը նոր լիցք պիտի հաղորդէ հայ-աւստրիական յարաբերութիւններուն: «Շնորհակալութիւն իւրաքանչիւրիդ` ձեր ջանքերի համար, որ գործադրում էք մեր երկիրն Աւստրիայում աւելի ճանաչելի դարձնելու, հայագիտական հետազօտութիւններին աջակցելու եւ Լեռնային Ղարաբաղի Հանրապետութիւնը յատուկ ուշադրութեան կենտրոնում պահելու համար: Վստահ եմ, որ Արցախում ձեզ մեծ բացայայտումներ են սպասում` Արցախը, ի հարկէ, Հայաստան է, բայց յատուկ Հայաստան»,- դիմելով հիւրերուն` նշած է Արմէն Աշոտեան:

Շնորհակալութիւն յայտնելով ընդունելութեան համար` Աւստրիոյ գիտութեան եւ մշակոյթի նախարարութեան 1992-2011-ի գիրքերու հրատարակչութեան բաժինի ղեկավար Ալոիս Զէոհնի նշած է, որ այցելութեան նպատակը Հայաստանի պատմութեան եւ մշակոյթին աւելի խորութեամբ ծանօթանալն է` ընդգծելով, որ աւստրիացիները Հայաստանի մշակոյթին ծանօթ են նախեւառաջ Վիեննայի Մխիթարեան միաբանութեան միջոցով:

Աւստրիոյ գիտութեան եւ մշակոյթի նախկին նախարար տիկին Էլիզապէթ Կեհրերի իր խօսքին մէջ կարեւոր համարած է կրթութեան, գիտութեան եւ հետազօտութիւններու ոլորտներուն մէջ հայ-աւստրիական կապերուն ընդլայնումը:

Հանդիպման աւարտին կրթութեան, գիտութեան ոլորտին մէջ ներդրած աւանդին եւ հայանպաստ գործունէութեան համար` նախարար Արմէն Աշոտեան Աւստրիոյ գիտութեան եւ մշակոյթի 1995-2007-ի նախարար տիկին Էլիզապէթ Կեհրերին եւ նոյն նախարարութեան 1992-2011-ի գիրքերու հրատարակչութեան բաժինի ղեկավար պարոն Ալոիս Զէոհնին պարգեւատրած է ՀՀ կրթութեան եւ գիտութեան նախարարութեան բարձրագոյն պարգեւով` «Ոսկէ յուշամետալ»-ով:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button
 

STAINLESS STEEL

 

–>