Մատենադարանն ու Հռոմի Արխիւային եւ Գրքային Ժառանգութեան Վերականգնման Հիմնարկը Պիտի Համագործակցին

Հռոմի Արխիւային եւ գրքային ժառանգութեան վերականգնման ու պահպանման կեդրոնական հիմնարկի տնօրէն Մարիա Քրիսթինա Միզիդիի գլխաւորած պատուիրակութիւնը Հոկտեմբեր 10-12 այցելած է Երեւան: Այս մասին կը տեղեկացնեն ՀՀ արտաքին գործոց նախարարութեան մամուլի, տեղեկատւութեան եւ հասարակայնութեան հետ կապերու վարչութենէն:

Այցը նախաձեռնած եւ կազմակերպած էր Իտալիոյ մէջ ՀՀ դեսպանութիւնը: Այցին ծիրէն ներս քննարկուած են Հռոմի Արխիւային եւ գրքային ժառանգութեան վերականգնման ու պահպանման կեդրոնական հիմնարկի եւ Մատենադարանի միջեւ հնարաւոր համատեղ ծրագրերու իրագործումը, ստորագրուած է երկու հաստատութիւններուն միջեւ համագործակցութեան մասին արձանագրութիւն:

Արձանագրութեան ստորագրման արարողութեան ներկայ եղած է նաեւ Իտալիոյ մէջ ՀՀ դեսպան Ռուբէն Կարապետեան: Ստորագրուած արձանագրութիւնը կը նախատեսէ համագործակցութիւն ձեռագրերու պահպանման եւ վերականգնման բնագաւառին մէջ, մասնագէտներու փոխայցելութիւններ, Արխիւային եւ գրքային ժառանգութեան վերականգնման ու պահպանման կեդրոնական հիմնարկի կողմէ կազմակերպուող հնգամեայ դասընթացին Հայաստանէն ուսանողի ներառում:

Հայաստան ժամանած պատուիրակութիւնը մասնակցած է նաեւ Մատենադարանին մէջ իրականացուած «Յիշողութեան կերպարանքները. ձեռագիր եւ տպագիր ժառանգութեան պահպանումն ու վերականգնումը. ձեռագիր ֆոնտեր” 2-րդ միջազգային սեմինարին` ներկայացնելով ելոյթներ Արխիւային եւ գրքային ժառանգութեան վերականգնման ու պահպանման կեդրոնական հիմնարկին կողմէ ծաւալուող գործունէութեան եւ այդ հաստատութեան գիտահետազօտական հնարաւորութիւններուն մասին:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button
 

STAINLESS STEEL

 

–>