ԱՄՆ Գոնկրէսը Հայոց Ցեղասպանութեան Հարցին Պիտի Անդրադառնայ Նոյեմբերին

 Հայոց Ցեղասպանութեան բանաձեւին ԱՄՆ-ի Ներկայացուցիչներու պալատին մէջ կը սատարէ 92 գոնկրէսական: Ծերակոյտի բանաձեւի աջակիցներուն թիւը 17 է: ԱՄՆ-ի Հայ Դատի յանձնախումբի տեղեկութիւններով` բանաձեւի աջակիցներու թիւին աւելնալուն ուղղութեամբ շարունակական աշխատանքներ կը տարուին` նամակներու, հանդիպումներու, թռուցիկներու միջոցով: Ըստ ԱՄՆ-ի Հայ Դատի գրասենեակի մամլոյ քարտուղար Եղիսաբէթ Չուլճեանի` ԱՄՆ-ի յառաջիկայ նախագահական ընտրութիւնները նոյնպէս առիթ պիտի հանդիսանան ամերիկահայ համայնքին համար, որպէսզի բարձրաձայնուի Ցեղասպանութեան, Լեռնային Ղարաբաղի եւ շարք մը այլ հարցեր, որպէսզի անոնց մասին տեղեկանան ե’ւ ներկայ քոնկրէսականները, ե’ւ անոնց հակառակորդ թեկնածուները:

«Հայոց Ցեղասպանութեան հարցը ԱՄՆ-ի Գոնկրէսին մէջ պիտի քննարկուի Նոյեմբերի վերջը, քանի որ հիմա բոլորը կեդրոնացած են ընտրապայքարներու վրայ: Նոյեմբերի վերջը յաջորդ առիթը պիտի ըլլայ, որ գոնկրէսականները, ծերակուտականները եւ ներկայացուցիչներու պալատի անդամները անդրադառնան այս հարցին»,- կը նշէ Ե. Չուլճեան:

Նշենք, որ 2010-ին ԱՄՆ-ի Գոնկրէսի Ներկայացուցիչներու պալատի արտաքին յարաբերութիւններու յանձնաժողովը ընդունեց Հայոց Ցեղասպանութիւնը ճանչցող թիւ 252 բանաձեւի նախագիծը: Օրինագիծը, այնուամենայիւ, չներառուեցաւ Գոնկրէսի լիագումար նիստի օրակարգին մէջ: Օրինագիծը մշակուած եւ Ներկայացուցիչներու պալատի յանձնաժողովին ներկայացուած էր քոնկրէսականներ Ատամ Շիֆի, Ճորճ Ռատանովիչի եւ Գոնկրէսի հայկական հարցերով յանձնախումբի համանախագահներ Ֆրենք Փալոնի ու Մարք Քըրքի հովանաւորութեամբ:

Թիւ 252 բանաձեւը կոչ կ’ուղղէ ԱՄՆ-ի նախագահին` ապահովել, որ Միացեալ Նահանգներու արտաքին քաղաքականութիւնը արտացոլէ պատշաճ ըմբռնում Հայոց Ցեղասպանութեան վերաբերեալ Միացեալ Նահանգներու արձանագրութիւններուն մէջ փաստուած` մարդու իրաւունքներու, ցեղական զտումներու եւ ցեղասպանութեան հարցերու առնչութեամբ, ինչպէս նաեւ ապրիլքսանչորսեան իր ամենամեայ ուղերձին մէջ ճշգրիտ կերպով բնորոշէ 1,5 միլիոն հայերու կանխամտածուած բնաջնջումը իբրեւ ցեղասպանութիւն: Բանաձեւի ծանօթագրութիւններուն մէջ այնուհետեւ շատ յստակ կը նշուի. «Հայոց Ցեղասպանութիւնը ծրագրուած եւ իրականացած է Օսմանեան Կայսրութեան կողմէն 1915-1923-ին, որուն իբրեւ արդիւնք տեղահանուած է երկու միլիոն հայ: Անոնց մէկուկէս միլիոնը սպաննուած է, իսկ կէս միլիոն վերապրածներ վտարուած են իրենց տուներէն: Այս բոլորին հետեւանքով վերացուեցաւ հայերուն 2500 տարուան ներկայութիւնը իրենց պատմական հայրենիքին մէջ»:

Նշենք նաեւ, որ Ներկայացուցիչներու պալատի Արտաքին հարցերու յանձնաժողովը նման բովանդակութեամբ բանաձեւեր ընդունած է նաեւ 2000, 2005 եւ 2007-ին: Թէեւ այդ բանաձեւերը շատ մեծ աջակցութիւն կը վայելէին Գոնկրէսի մէջ, Ներկայացուցիչներու պալատի լիագումար նիստին քուէարկութեան չդրուեցան, քանի որ թէ’ նախագահ Պիլ Գլինթըն, եւ թէ’ նախագահ Ճորճ Պուշ դէմ արտայայտուեցան բանաձեւերուն ընդունման` պատճառաբանելով, որ թուրքերը կրնան պատասխան քայլերու դիմել:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button
 

STAINLESS STEEL

 

–>