Երեւանի Նար-Դոսի Անուան Թիւ 14 Հիմնական Դպրոցին Մէջ Պիտի Գործէ Սուրիական «Կիլիկիա» Վարժարանը

ՀՀ տարածքային կառավարման նախարարութեան առընթեր Միգրացիոն պետական ծառայութեան տուեալներով` Հայաստանի Հանրապետութեան մէջ այս պահուն կայ 4000 սուրիահայ: Այս մասին կը հաղորդէ ՀՀ սփիւռքի նախարարութիւնը:

Սուրիահայերը յուզող կարեւոր խնդիրներէն մէկն ալ կրթութեան հարցն է: Սուրիահայ ընտանիքներուն մեծ մասը Հայաստան հաստատուած են ժամանակաւոր, հետեւաբար կը փափաքին, որ իրենց երեխաները չընդհատեն կրթական գործընթացը, որպէսզի վերադարձէն ետք դժուարութիւններ չի յառաջանան: Սուրիոյ հայկական կազմակերպութիւնները, «Կիլիկիա» բարեգործական միութեան նախաձեռնութեամբ, դիմած էին ՀՀ սփիւռքի նախարարին` սուրիական պետական ծրագիրով դպրոց բանալու առաջարկով: Երկարատեւ նախապատրաստական աշխատանքներէ ետք դպրոցը արդէն իրականութիւն է:

Հոկտեմբեր 8-էն սկսեալ` Երեւանի Կեդրոն վարչական շրջանին մէջ գտնուող Նար-Դոսի անուան թիւ 14 հիմնական դպրոցին մէջ պիտի գործէ սուրիական «Կիլիկիա» վարժարանը: Ամէն ինչ պիտի կատարուի, որ Սուրիա վերադառնալէ ետք երեխաները կրնան շարունակել ուսումը` ետ չմնալով կրթական ծրագիրէն:

Արդէն իսկ սկսասծ է դիմումներու ընդունումը:

Վարժարանի տնօրէն նշանակուած է Նորա Փիլիպպոսեան, որ Հալէպի «Կիլիկիա» վարժարանի ուսուցչուհի է եւ 20 տարուան մանկավարժական փորձառութիւն ունի.
«ՀՀ սփիւռքի, կրթութեան եւ գիտութեան նախարարութիւններու, Երեւանի քաղաքապետարանի աջակցութեամբ եւ «Կիլիկիա» բարեգործական միութեան հովանաւորութեամբ մենք արդէն բաւական քայլ առաջ գացնք, եւ յոյսով եմ, որ պիտի յաջողինք այս ծրագիրին մէջ: Հայաստանի մէջ մօտ 200-220 սուրիահայ երեխայ կայ, իսկ թէ քանի հոգին պիտի յաճախեն այս դպրոց, պարզ պիտի դառնայ յառաջիկայ օրերուն ընթացքին: Մինչեւ այժմ մօտ 70 դիմում ընդունած ենք»,- նշած է Նորա Փիլիպպոսեան:

Վարժարանի տնօրէնը նաեւ աւելցուց, որ արդէն լուծուած է ե’ւ ուսուցիչներու, ե’ւ դասագիրքերու հարցը:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button