“Հայկական Վիրթուալ Համալսարան”-ը Տուաւ Իր Առաջին Շրջանաւարտները

 “Հայկական վիրթուալ համալսարան”-ը տուաւ իր առաջին շրջանաւարտները: Հայկական բարեգործական ընդհանուր միութեան (ՀԲԸՄ) գործարար կեդրոնի մեծ սրահին մէջ կայացաւ համալսարանի երեքամեակին նուիրուած համընդհանուր ֆորումը:

Ըստ PanArmenian.net-ին` լրագրողներու հետ զրոյցին ընթացքին` Հայկական բարեգործական ընդհանուր միութեան (ՀԲԸՄ) Սիլիկոն Վելիի ներկայացուցիչ, ՀՎՀ հիմնադիր տնօրէն Երուանդ Զօրեան նշած է, թէ համալսարանի ծրագիրը նախագծուած է 2004-ին, այնուհետեւ ծրագրի ճարտարագիտութիւնը բազմակողմանիօրէն մշակուած է Հայաստանի մէջ` Երեւանի պետական համալսարանի Կրթութեան եւ հետազօտութեան տեղեկատուական ճարտարագիտութիւններու կեդրոնի գիտնականներու եւ ծրագրաւորողներու համագործակցութեամբ: “Գործելով 2010-էն` համալսարանը այսօր պիտի տայ իր առաջին շրջանաւարտները, քանի որ դասընթացը կ’ընդգրկէ ութ եռամսեակ: ՀՎՀ-ն ստեղծուած է` յաղթահարելու կրթական այն խոչընդոտները, որ տասնամեակներ շարունակ կը մտահոգէին հայկական սփիւռքը:

“ՀՎՀ-ի նպատակն է` ողջ աշխարհի հայութեան համար` ստեղծել հայկական կրթութիւն ստանալու հնարաւորութիւն: Անիկա ուղղուած է ներկայ ուսանողութեան` այսպիսով հաւաստիացնելով ՀԲԸՄ կրթական նպատակները: Հակառակ անոր, որ վիրթուալ հաստատութիւնը աւելի շատ ուղղուած է այն անհատներուն, որոնք չեն մասնակցիր դէմ առ դէմ հայկական կրթական ծրագրերուն, ՀՎՀ-ն նաեւ կը լրացնէ այն անձերուն կրթական հենքը, որոնք կը յաճախեն աւանդական հայկական հաստատութիւններ”,- նշած է ան` աւելցնելով, որ ՀՎՀ աւարտելէ ետք ստացած վկայականը ուժ ունի աշխարհի տարբեր համալսարաններու եւ ուսումնական հաստատութիւններու մէջ:

ՀՀ կրթութեան եւ գիտութեան նախարար Արմէն Աշոտեան իր հերթին նշած է, որ “Հայկական վիրթուալ համալսարան”-ի գործունէութիւնը մեծ կարեւորութիւն ունի Սփիւռքի մէջ հայապահպանութեան առաքելութիւնը իրականացնելու գործին մէջ: “Այս կարեւոր նախաձեռնութիւնը նոր է սկսում իր ճանապարհը եւ արդէն 7000-ից աւելի ուսանողներ ունի 61 երկրներում: Կարեւորելով ՀՎՀ դերը հայկական պատմութեան, լեզուի եւ մշակոյթի պահպանութեան եւ տարածման գործում` ՀՀ ԿԳՆ-ն դիտարկում է համալսարանին պետական կարգավիճակ տալու հարցը”,- ըսած է ան` ընդգծելով, որ ՀՎՀ-ն լաւագոյն այլընտրանքներէն է յատկապէս իբրեւ հետաւարտական դասընթաց:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button

 

STAINLESS STEEL