Ն.Ս.Օ.Տ.Տ. Արամ Ա. Կաթողիկոս Կ’ողջունէ Համաշխարհային Հայկական Գոնկրէսի Համագումարը Երեւանի Մէջ

 Համաշխարհային Հայկական Գոնկրէսի նախագահ Տիար Արա Աբրահամեան յատուկ հրաւէր ուղղած էր Ն.Ս.Օ.Տ.Տ. Արամ Ա. Վեհափառ Հայրապետին, ներկայ գտնուելու եւ իր պատգամը ուղղելու այս օրերուն Երեւանի մէջ կայացող յիշեալ Գոնկրէսի երկրորդ համագումարին: Այս մասին կը հաղորդէ Կիլիկիոյ կաթողիկոսութեան տեղեկատուականը:

Այս առիթով, Վեհափառ Հայրապետը Տիար Աբրահամեանին ուղղած իր նամակին մէջ Համաշխարհային Հայկական Գոնկրէսի համագումարի կայացումը կը նկատէ կարեւոր քայլ մը մեր ժողովուրդի կեանքի ներկայ հանգրուանին, նկատի ունենալով որ յիշեալ համագումարի ընթացքին լայնօրէն պիտի քննարկուին «Հայոց Ցեղասպանութեան, Ղարաբաղեան հարցի կարգաւորման, սփիւռքահայ ինքնութեան պահպանման, Հայաստան–Սփիւռք գործակցութեան ամրապնդման, Հայաստանի մեր ժողովուրդի տնտեսական կեանքի բարելաւման եւ Հայաստանի առաւել հզօրացման առնչուած շարք մը հարցեր»: Ապա, Վեհափառը կ’աւելցնէ՝ «այս խնդիրները ու ծրագիրները համահայկական բնոյթ ունին ու հետեւաբար համահայկական մաշտապով պէտք է քննարկուին եւ համապատասխան ուղեգիծեր ճշդուին: Վստահաբար, Համաշխարհային Հայկական Գոնկրէսը ա՜յս ոգիով ու տեսլականով լծուած է աշխատանքի»:

Վեհափառ Հայրապետը իր խօսքը կ’եզրափակէ հետեւեալ բառերով՝ «Պատմութեան մեծ իրագործումները կատարուած են հաւատքով, տեսիլքով ու միասնակամ ոգիով: Այսօր մեր հայրենիքն ու ժողովուրդը մեծ մարտահրաւէրներու դիմաց կը գտնուին: Մենք կոչուած ենք, Հայաստանի թէ Սփիւռքի մէջ հաւատարիմ մեր պատմութեան ձայնին ու մեր պապերու սրբազան կտակին, միասնաբար դիմագրաւելու բոլոր տեսակի մարտահրաւէրները ու մեր ազգն ու հայրենիքը առաջնորդելու դէպի պայծառ ապագայ»:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button

 

STAINLESS STEEL